Украина президенти Владимир Зеленский фикрича, Россия қўшинлари 1991 йилги чегаралардан чекинган тақдирда, ҳарбий низони дипломатик йўл билан тартибга солиш масаласига қайтиш мумкин. Economist журналига берган интервьюсида у украиналиклар «ҳудудий муросаларга боришни истамаётгани»ни айтди.
Зеленскийнинг сўзларига кўра, Украина учун «Россия томонидан шу йил босиб олинган ҳудудларгина эмас, Қримни ҳам», шунингдек, Донбасснинг бир қисмини ҳам қайтариб олиш муҳимдир.
Унинг айтишича, Россия қўшинларининг чекиниши ҳақида фақат Владимир Путин қарор қабул қила олади. «Агар у ҳозир 1991 йилги чегараларгача чекинса, шунда эҳтимолий дипломатия йўли бошланади. Урушни ҳарбий йўлдан дипломатик йўлга бура оладиган одам аслида шу киши. Буни фақатгина у қила олади», — дея таъкидлади Украина президенти.
Владимир Зеленский Украина Қримни ҳеч қачон Россиянинг бир қисми деб тан олмаслигини ҳамда 30 сентябрдан Россия таркибига қўшилган Донецк ва Луганск халқ республикалари мухториятига рози бўлмаслигини кўп марта айтган. Июнь ойида Украина ташқи ишлар вазири Дмитрий Кулеба Киев «24 февралдан аввалги» ҳолат бўйича давлат чегараларига қайтиш масаласини Москва билан муҳокама қилишга тайёрлигини билдирганди.
Изоҳ (0)