Ukraina prezidenti Vladimir Zelenskiy fikricha, Rossiya qo‘shinlari 1991-yilgi chegaralardan chekingan taqdirda, harbiy nizoni diplomatik yo‘l bilan tartibga solish masalasiga qaytish mumkin. Economist jurnaliga bergan intervyusida u ukrainaliklar “hududiy murosalarga borishni istamayotgani”ni aytdi.
Zelenskiyning so‘zlariga ko‘ra, Ukraina uchun “Rossiya tomonidan shu yil bosib olingan hududlargina emas, Qrimni ham”, shuningdek, Donbassning bir qismini ham qaytarib olish muhimdir.
Uning aytishicha, Rossiya qo‘shinlarining chekinishi haqida faqat Vladimir Putin qaror qabul qila oladi. “Agar u hozir 1991-yilgi chegaralargacha chekinsa, shunda ehtimoliy diplomatiya yo‘li boshlanadi. Urushni harbiy yo‘ldan diplomatik yo‘lga bura oladigan odam aslida shu kishi. Buni faqatgina u qila oladi”, — deya ta’kidladi Ukraina prezidenti.
Vladimir Zelenskiy Ukraina Qrimni hech qachon Rossiyaning bir qismi deb tan olmasligini hamda 30-sentabrdan Rossiya tarkibiga qo‘shilgan Donetsk va Lugansk xalq respublikalari muxtoriyatiga rozi bo‘lmasligini ko‘p marta aytgan. Iyun oyida Ukraina tashqi ishlar vaziri Dmitriy Kuleba Kiyev “24-fevraldan avvalgi” holat bo‘yicha davlat chegaralariga qaytish masalasini Moskva bilan muhokama qilishga tayyorligini bildirgandi.
Izoh (0)