Америка Қўшма Штатлари президенти Дональд Трампнинг энг катта ютуғи Украинада тинчлик ўрнатиш бўлиши мумкин эди. Бироқ Трамп бунинг учун бошқа давлатларда муваффақиятли қўллаган босим ўтказиш стратегиясини ишга солиши лозим. Бу ҳақда The Wall Street Journal ёзди.
Манбага кўра, Дональд Трамп Жо Байденни Украинага фақат ҳимояланишга рухсат берганликда айблади. У “фақат ҳимоя билан ғалабага эришиб бўлмаслигини” таъкидлади. Бу баёнот орқали Трамп АҚШнинг узоқ масофали ракеталаридан Россия ичкарисидаги нишонларга зарба беришга рухсат этилишини назарда тутгандек туйилди. Бу эса Россия президенти Владимир Путинга босим ўтказиб, уни музокара столига мажбур қилиши мумкин эди.
Кейинчалик маълум бўлдики, АҚШ Мудофаа вазирлиги Украинага айнан шундай узоқ масофага учувчи қуроллардан фойдаланишни тақиқлаган.
“Бундай тақиқ Пентагоннинг стратегик бўлими раҳбари Элбридж Колбининг сўнгги “шоҳ асари” бўлса керак. Савол туғилади: АҚШнинг Украина бўйича сиёсатида ким асосий ролни ўйнаяпти? Трампми ёки вице-президент Жей Ди Венснинг Пентагонидаги одамими?”, дея ёзади нашр.
Аляскадаги саммит ҳеч қандай натижа бермади. Бу фақат Владимир Путинга санкциялардан қочиш имконини берди. Трамп нима қилишни ўйлаш учун икки ҳафта кераклигини айтди. У масъулиятни ҳар икки томонга ҳам юкламоқда. Бироқ Путиннинг мақсади — Украинани давлат сифатида йўқ қилиш. Шунинг учун урушни ер алмашиш орқали ҳал қилиб бўлмайди.
Трампнинг Путинни тинчликка кўндириш уринишлари муваффақиятсиз тугади. Энди АҚШ президенти бошқа давлатларда жуда самарали қўллаган босим ўтказиш стратегиясига ўтиши лозим.
“Трамп сайловчиларга қўлидан келганча Путинни тинчликка мажбурлашга ҳаракат қилганини очиқ айта олади. Бироқ бу уриниш муваффақиятсиз тугади. Кейинги стратегия эса Трамп бошқа минтақаларда самарали қўллаган максимал босим сиёсатидир. Трамп урушга барҳам бериш учун Путинга давом эттириш нархи жуда юқори эканини тушунтириши лозим”, дея хулоса қилади WSJ.
New York Post нашрининг ёзишича, Владимир Путин музокаралардан воз кечиш “санъати” билан нафақат Владимир Зеленскийни, балки Дональд Трампни ҳам “тролл” қилмоқда. Таҳлилчиларга кўра, Дональд Трамп куч ишлатишга ўца, Путин Аляскадаги тинчлик сигналларини ўзининг шармандалигига айлантириб қўйиши мумкин.
Аввалроқ Дональд Трамп уруш учун Украинага пул бермаслигини маълум қилган эди. Америка Украинага берадиган қуроллар учун НАТО давлатлари пул тўлайди. Шунингдек, у Украинадаги можарони тўхтатиш энг осони бўлади, деб хато ўйлаганини тан олган. Бироқ барибир уруш тартибга солинишига ишонч билдиришини айтган.
Изоҳ (0)