Евроиттифоқ Россияга қарши санкцияларнинг тўққизинчи пакетини келишиб олди

Евроиттифоқ мамлакатлари ҳукуматлари Украинадаги уруш туфайли, Россияга қарши санкцияларнинг тўққизинчи пакетини келишиб олди. Бу ҳақда европалик дипломатларга таяниб, Reuters ва AFP хабар бермоқда.

Reuters манбаларига кўра, расмий ёзма жараён 16 декабрь куни тушгача якунланади. Агентлик манбалари бошқа тафсилотларни тақдим этмади.

Янги чекловлар бўйича келишиб олингани ҳақида расман эълон қилинганича йўқ.

Аввалроқ Reuters’нинг дипломатик манбалари Евроиттифоқ мамлакатлари санкцияларнинг тўққизинчи пакети бўйича келишувга эриша олмаганини айтганди. Агентлик маълумотларига кўра, музокаралар иштирокчилари келишувга яқинлашган, бироқ улар баъзи мамлакатлар, масалан, Польшанинг норозиликларига ечим топа олмаган.

Келишмовчиликни келтириб чиқарган масалалардан бири — Евроиттифоқ санкция рўйхатларига тушган россиялик бизнесменларга тегишли компаниялар учун ҳам Европа портлари орқали Россия ўғитларини экспорт қилишга чекловларни камайтириши керак ёки керак эмаслиги бўлди.

Баъзи Европа мамлакатлари ўғитларга нисбатан чекловлар ривожланаётган мамлакатлар озиқ-овқат хавфсизлигига таҳдид солади, деб ҳисоблади. Бошқалари эса санкцияларнинг юмшатилиши Россияда ўғит ишлаб чиқарувчи корхоналар эгаларига аввалроқ киритилган чекловларни четлаб ўтиш имконини беришини айтди.

«Истиснолар ҳали ҳам бор. Лекин уларга аниқлик киритилдики, Евроиттифоққа аъзо ҳар битта давлат ўзининг миллий хавфсизлик манфаатларини эътиборга олиши мумкин бўлди», — деди «Радио Свобода» журналисти Рикард Йозвяк.

Еврокомиссия янги санкциялар ҳаида декабрь бошида эълон қилган эди. Чекловлар рўйхатига баъзи тоифадаги товарлар, шу жумладан, қўш мақсадли ва электроника товарлари экспорти учун чекловлар, Россия ва Россияга сотиши мумкин бўлган учинчи мамлакатларга дронлар ишлаб чиқариш учун деталлар экспортига тақиқ кириши хабар берилганди.

Бундан ташқари, Россиянинг тўртта телеканалини узатишнинг тақиқланиши, Россиянинг учта банки, шунингдек, компаниялар ва жисмоний шахслар — ҳукумат ходимлари, ҳарбийлар ва Давлат думаси депутатларига нисбатан санкциялар ҳақида маълум қилинганди.