Украина қуролли кучлари бош штаби расмийси, бригада генерали Алексей Громов Россия ўз йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини айтди.
Маълум қилинишича, Россия ҳукумати шу мақсадда ҳарбий хизматга чақирилиши мумкин бўлган фуқаролар рўйхатини кенгайтириш учун бир қатор қонун ҳужжатларини қабул қилган. Хусусан, Россиянинг янги қонунчилик меъёрларига кўра, жазо муддатини ўтаётган фуқароларни сафарбар қилиш учун ҳарбий хизматга чақиришга рухсат берилади.
«Ушбу ўзгаришлар, биринчи навбатда, Россия ҳудудида бўлган меҳнат муҳожирларини ҳарбий хизматга жалб этишга қаратилган», — дея тушунтирди Громов.
У ҳозирда Россияда, асосан, Осиё ва Кавказдан 6 миллионга яқин киши истиқомат қилишини айтди. Уларнинг қарийб 50 фоизи Ўзбекистондан, 30 фоизи Тожикистондан, қолган муҳожирлар Қирғизистон, Арманистон, Озарбайжон ва бошқа мамлакатлардан келганлардир.
«Муҳожирларнинг умумий сонидан қарийб 2,7 миллион кишини, деярли 45 фоизини ҳарбий ёшдаги эркаклар ташкил қилади», — дейди бригада генерали.
Шу билан бирга, генера «Луганск халқ республикаси» эркакларни мажбурий сафарбар қилишда давом этишини айтди. Хусусан, Ровенки қишлоғида ҳарбийлар кейинчалик рус кучларининг 2-армия корпуси сафига чақириш учун эркакларни қидирган. Луганскка барча чиқиш ва кириш йўлларини тўсиб қўйилган.
Мавзуга доир:
Изоҳ (0)