Kreml Ukraina bilan muzokaralarni boshlash uchun o‘z shartini aytdi

Agar Kiyev siyosiy irodasini namoyon qilsa, Rossiya va Ukraina muzokaralarni qayta boshlashi mumkin, dedi Rossiya prezidenti matbuot kotibi Dmitriy Peskov. Uning qayd etishicha, Ukraina hukumati Moskvaning talablarini muhokama qilishga tayyorligini ham ko‘rsatishi kerak.

Peskovning so‘zlariga ko‘ra, hozir “hech qanaqa muzokaralarning imkoni yo‘q, chunki ular Ukraina tomonidan mutlaqo rad etilmoqda”. “Siyosiy iroda bo‘lishi kerak, Rossiyaning allaqachon ma’lum bo‘lgan talablarini muhokama qilishga shaylik bo‘lishi kerak”, — deya Kreml vakili aniqlik kiritdi press-koll chog‘ida.

Mamlakatlar o‘rtasidagi ikki tomonlama muzokaralar may oyida Kiyevning tashabbusi bilan to‘xtatilgan edi. 4-noyabr kuni esa Ukraina prezidenti Vladimir Zelenskiy Vladimir Putin prezidentligi ostidagi Rossiya bilan muzokaralar olib borishni taqiqlovchi farmonni imzoladi. 25-noyabr kuni Ukraina tashqi ishlar vaziri Dmitriy Kuleba Kiyev Moskva bilan muzokaralarga qarshi emasligini, biroq Ukrainaning hududiy yaxlitligi qayta tiklanganidan keyingina buning imkoni bo‘lishini aytdi.

AQSH esa Kiyevga Moskvaga nisbatan “haqiqatga yaqinroq talablar” haqida o‘ylab ko‘rishni maslahat bermoqda. AQSH prezidentining milliy xavfsizlik bo‘yicha maslahatchisi Jeyk Sallivan Ukraina yetakchisi Vladimir Zelenskiyning jamoasiga Moskva bilan muzokaralar uchun “haqiqatga yaqin talablar va birlamchi vazifalar” haqida o‘ylab ko‘rishni, shu jumladan, Kiyevning Qrimni qaytarib olish maqsadini qayta ko‘rib chiqishni tavsiya qilgan.

Avvalroq Ukraina prezidenti Vladimir Zelenskiy o‘zi uchun Rossiya bilan yarashuv muzokaralari imkoniyatini istisno qilmayotganini bildirgandi. U 8-noyabr kuni Rossiya bilan muloqot boshlash uchun Ukrainaning shartlarini ma’lum qilgandi. Ular esa Rossiyaga qo‘shib olingan hududlar qaytarilgan holda Ukraina hududiy yaxlitligining qayta tiklanishi, BMTga hurmat, barcha zararlarning qoplanishi, har bitta harbiy jinoyatchining jazolanishi va bu boshqa hech qachon takrorlanmasligining kafolatlanishidan iborat edi.

Keyinroq Zelenskiyning Rossiya bilan muzokaralar uchun shartlari haqidagi bayonoti AQSHning “yengilgina turtkisi” bilan bog‘liq bo‘lgani haqida xabar berildi.