Андижон вилояти Марҳамат тумани ҳокими ўринбосари — Маҳалла ва оилани қўллаб-қувватлаш бўлими бошлиғи Маъмура Сотволдиева туман маданият бўлими бошлиғи Акмал Йўлдошевни тилга олиб бўлмас сўзлар билан ҳақоратлади.
Ижтимоий тармоқларда тарқалган мазкур аудиоёзувдаги асл ҳолатни ўрганиш учун «Дарё» мухбири Марҳаматда бўлди.
Ҳоким ўринбосари ҳамда маданият бўлими бошлиғи ўртасидаги мулоқотда Маъмура Сотволдиева бўлиб ўтган тадбирга ишора қилиб, «Қўлингдан келмаса айтмайсанми? Мени шарманда қилдинг. Вилоят ҳокимининг олдида туман ҳокимини шарманда қилдинг», дея танбеҳ беради. Шунингдек, Акмал Йўлдошевни «Бугун ишдан бўшатмасам, одаммасман», деб огоҳлантиради.
«Дарё» мухбири билан суҳбатлашган Акмал Йўлдошевнинг маълум қилишича, бир гуруҳ ишсиз ёшларга деҳқончилик учун Марҳамат туманининг Полвонтош қишлоғи адирликларидан ер ажратишга қарор қилинган ва 2020 йил 10 март куни тадбирнинг очилиш маросими ўтиши лозим бўлган. Туман маданият бўлими ходимлари ўша тадбирда бўлгани боис, вилоят ҳокими иштирокидаги тадбирга кечикиб келган. Оқибатда тадбир овоз кучайтиргичсиз ўтган.
«10 мартдаги тадбир учун бўлимга қарашли бир дона овоз кучайтиргич манзилга етказилди. Бироқ кутилган меҳмон келмагани сабабли тадбир 11 мартга қолдирилди. Айни шу куни туман марказидаги янги ишлаб чиқариш цехлари ҳам очилиши керак эди. Шу сабаб аппарат адирдан цехга қайтариб олиб келинди. Тан олиш керак, болалар айтилган жойга белгиланган вақтдан бироз кечикиб келишди. Кимгадир ўчакишиб, атай қилмадик. Ўзи ташкилотимиз балансида битта овоз кўчайтиргич бор, холос. У ҳам алмисоқдан қолган, таъмирталаб. Устига-устак хизмат машинамиз йўқ. Аппаратларни тадбирларга кўчадан такси ёллаб етказиб борамиз», — дейди Акмал Йўлдошев.
Акмал Йўлдошевнинг айтишича, ҳоким ўринбосари аёл киши бўла туриб, ҳақоратомуз сўз айтгани учун нафсониятига теккан. Эркак киши сифатида буни ҳазм қилолмаган.
«Мен ҳам инсонман. Вазиятни тушунаман. Лекин ҳоким ўринбосарининг ташкилотимдаги шароитни била туриб, камига нафсониятимга текканлигини ҳазм қилолмадим. Ўз ўрнида мен ҳам «саломга яраша алик» қайтардим. Хизматини қилиб, ҳам қўшимчасига сўкиш эшитиш ҳар қандай кўнгилга оғир ботади», — дейди Акмал Йўлдошев.
Ўша кунги воқеалар гувоҳи, Марказ режиссёри Холмаматбек Янгибоевнинг маълумот беришича, ишлаб чиқариш цехининг очилишига 10-15 дақиқага кеч қолинган. Такси топилмаганлиги сабаб шу ҳолат юз берган.
«10 март куни Полвонтошдаги тадбир кейинги кунга қолдирилгач, аппаратларни ўша ерда қолдирдик. Сабаби марказдан у ергача салкам 15 километрли йўл. У ёқдан, буёққа ташиш учун ташкилотнинг машинаси йўқ. Ҳайдовчига ўзимизнинг ҳисобимиздан пул тўлаймиз. Очилиш маросими ҳақида эса жуда кеч эшитдик. Оралиқ масофа узоқлиги сабабли айтилган вақтдан 10-15 дақиқа кеч қолдик. Келганимизда вилоятдан меҳмонлар бор эди. Аввалига овоз кучайтигични улашга рухсат беришмади. Шунда ҳокимдан сўрасак, тезлик билан ўрнатишимиз зарурлигини айтди. Ундан сўнг тадбирни чиройли ўтказдик. Тугаши билан ҳоким аппаратларни ўзи машинага юклатиб, адирликка жўнатиб юборди. Ўша куни ҳаммаси яхши ўтди. Тушликка яқин опа бошлиғимизга телефон қилиб, ҳамманинг олдида сўкди. Ўш ерда эдим. Тўғриси, арзимаган ойликка ишини қилиб, сўкишини эшитиш одамнинг нафсониятига тегади-да. Айтингчи, битта аппарат билан бир вақтнинг ўзида қайси тадбирга улгуришимиз мумкин?», — дейди Холмаматбек Янгибоев.
Маданият марказининг яна бир режиссёри Нурхон Якубова сўнгги тўрт йил ичида туманда маданият соҳасига деярли эътибор қаратилмаганини билдирди. Унинг айтишича, ходимлар ҳокимнинг «аппаратчи»сига айланиб қолган.
«Мана бир неча йилдирки, режиссёр сифатида ишлайман. Аввалари ҳокимият вакиллари бизни ҳурмат қилишарди, тумандаги тадбирларнинг ҳеч бири бизсиз ўтмасди. Ҳар сафар байрамларга алоҳида тайёргарлик кўрардик. Шу сабабли ташқаридан санъаткор олиб келинмасди. Келганлари ҳам бизнинг дастуримиз тугашини кутарди. Ҳамжиҳатликда ишлардик. Лекин охирги тўрт йил мобайнида ҳокимият вакиллари бизни деярли одам ўрнида кўришмайди. Байрамларда саҳнага ҳокимнинг ўринбосарларига ёққанлар чиқади. Ёқмаганларга умуман йўл йўқ», — дейди Нурхон Якубова.
Марказ овоз режиссёри Мардон Алимовнинг айтишича, туманда ўтказиладиган оммавий тадбирларда ҳокимият вакилларининг аралашуви сабабли сценарийларга амал қилинмай қўйилган. Шу сабабли ҳам айрим ходимлар саҳнага чиқишдан кўнгли совуган.
«Мен ўзим қўшиқ айтаман. Наврўз, Мустақиллик ва бошқа байрамларга алоҳида тайёргарлик кўраман, жамоа билан маслаҳатлашиб янги қўшиқлар ёзамиз. Қиммат бўлса ҳам кийим тиктирамиз. Лекин тадбирларнинг ўртасида кимдир қўшиқ айтиб турган бўлса ҳам тўхтатиб, Тошкентдан ёки вилоятдан келган санъаткорларга навбат беришади. Буни қандай тушунишимиз керак? Ҳурматсизликми ёки менсимаслик? Ўзимда икки марта шунақа ҳодиса бўлгандан кейин умуман саҳнага чиқишга кўнглим совуган», — дейди Мардон Алимов.
Марказ мутахассиси Салимжон Аҳмедовнинг айтишига қараганда, охирги йилларда бўлимда раҳбарлар қўнимсизлиги мавжуд. Агарда бўлим бошлиғи ишдан кетса, барча ходимлар ҳам иш ташлаши мумкин.
«Сўнгги йиллар мобайнида бўлимда учта раҳбар алмашди. Ҳеч бошлиққа ёлчимадик. Мана бир йилдан ошиқ вақт ўтибдики, Акмалжон бизга раҳбарлик қилмоқда. Биносиз бўлсак ҳам нолимаймиз, қисқа муддат ичида жамоадаги бирдамлик янада кучайди. Агарда раҳбаримизни шу воқеа сабаб ишдан олишса, биз ҳам аризамизни ёзиб, ишдан кетишга қарор қилиб турибмиз. Ҳокимиятнинг айтганини қилмаса ёки кечикиб келганига ишдан ҳайдайверишса, бунақа бўлимнинг боридан йўғи яхшироқ. Бировни койишдан олдин етарли шароит ва имкониятларни яратиб беришсин. Кейин бажармаган ишимизни талаб қилишни билишсин», — дейди Салимжон Аҳмедов.
Марҳамат тумани ҳокими ўринбосари — Маҳалла ва оилани қўллаб-қувватлаш бўлими бошлиғи Маъмура Сотволдиева маданият бўлими бошлиғини қўрқитиш учун «сени ишдан бўшаттираман» деганини тан олди.
«Вилоят ҳокими ташаббуси билан март апрель ойларида 1200 га яқин хотин-қизларнинг бандлигини таъминлаш имкони бўлган ишлаб чиқариш корхоналарини ишга тушириш режалаштирилганди. «Марҳамат барака чеварлари» корхонаси уларнинг биринчиси эди. Ишлаб чиқариш цехининг очилиш маросимига овоз кучайтиргич мосламаси олиб келиш маданият бўлими бошлиғи зиммасига юклатилганди. Аммо аппаратуранинг вақтида келмагани сабаб тадбир бир соатга кечикди. Тўғриси, вилоятдан келган меҳмонлар олдида хижолатда қолдик. Мен ҳам гап эшитдим. Шу сабаб жаҳл устида Акмалга қаттиқ танбеҳ бердим, бу ишда бўладиган ҳолат. Ҳақоратомуз сўзларни гапирмадим, аммо сени ишдан бўшатаман, деган жойим бор», — дейди ҳоким ўринбосари.
Андижон вилоят ҳокимлигининг хабар беришича, вилоят ҳокими ўринбосари, Маҳалла ва оилани қўллаб-қувватлаш бошқармаси бошлиғи Манзура Юнусова ҳамда вилоят Маданият бошқармаси бошлиғи Марҳабо Сатторова 13 март куни мазкур ҳолатни ўрганиб чиққан. Уларнинг айтишича, ҳар иккала томон қилган ишидан афсусланиб, пушаймон эканлигини таъкидлаган ва бир-бирларидан узр сўраган. Дўстона келишувга эришилган.
Воқеа юзасидан Марҳамат туман ҳокимининг фармойишига асосан, Ўзбекистон Республикаси Меҳнат кодексининг 181-моддаси 1-банди билан Маъмурахон Сотволдиэвага туман ташкилоти раҳбарига нисбатан муомала маданиятига риоя этмаганлиги учун ҳайфсан интизомий жазоси берилган.
Изоҳ (0)