Давлат активларини бошқариш агентлиги томонидан 13 март, жума куни, «Трансформация: Иқтисодиётда давлат иштирокини кескин камайтириш» мавзусида давра суҳбати ташкил этилди. Бу ҳақда Дарё мухбири хабар берди.
Тадбир доирасида агентликнинг департмент бошлиғи Исмат Нусуров корхоналарнинг давлат тасарруфидан чиқарилиши масаласи бўйича журналистларга изоҳ берди.
«Ўтказилган таҳлил натижаларига кўра, бугунги кунда юртимизда 2 965 та давлат иштирокидаги корхоналар мавжуд. Улар республика ишчи гуруҳлари томонидан тўлиқ ўрганиб чиқилди. Ўрганиш натижалари асосида корхоналарнинг 81 фоизини давлат иштироки, тасарруфидан чиқариш белгиланди. Уларнинг 1 115 тасида давлат улушларини тўлиқ сотиш, яъни бу корхоналарда давлат иштирокини тўлиқ қисқартириш, 126 та кўчмас мулк давлат объектини хусусий секторга сотиш, 554 та корхонани (44 тасида қисман) давлат тасарруфида сақлаб қолиш таклифи киритилган. Қарор ҳар йили маҳсулот бозори ва конюнктурадаги ўзгаришлардан келиб чиққан ҳолда қайтадан кўриб чиқилади. Бу йил давлат иштироки зарур корхоналарда кейинги йил ҳолат ўзгариши мумкин. Шунинг учун корхоналар рўйхати ҳар йили қайта кўриб чиқилади».
Давлат улуши тўлиқ сотиладиган корхоналар орасида тармоқлар кесимида нефть ва газ, энергетика, кимё саноати, банклар, молия ташкилотлари, ёғ-мой ташкилотлари, алкогол маҳсулотларини ишлаб чиқарувчилар, лойиҳалаш институтлари, газета ва журналлар, бозор ва комплекслар ҳамда бошқаларни кўриш мумкин.
Катта ҳажмдаги хусусийлаштириш дастури вазирликлардан олинган таклифлар асосида эмас, балки корхоналарда давлат иштироки бўйича таҳлил ўтказган масъул вазирликларнинг ходимлари, эскпертлар ҳамда мутахассислардан иборат комиссия хулосаси асосида тузилади.
Босқичма-босқич хусусийлаштириш жараёнида алоҳида ёндашув асосида юқори даромадли корхоналарнинг акциялари IPO ва SPO усулида аҳоли ўртасида сотувга чиқарилади. Давлат улуши сақланиб қолинадиган корхоналарга стратегик инвесторлар, хориж менежменти, корпоратив бошқарув тизими услублари жорий этилади.
Айрим объектларни тадбиркорлар сотиб олиб, фаолият бошлаши учун тўғридан-тўғри кимошди савдоларига қўйилади. Сотиш ҳамда танлов жараёнлари E-ijro auksion электрон савдо майдончаси ва Тошкент фонд биржасида эълон бериш орқали очиқ тарзда ўтказилади.
Бугунги кунда хусусий мулк сифатида самарали фаолият кўрсатаётган корхоналарнинг бирортасида давлат иштироки сақлаб қолинмаслиги, иштирокни сақлаб қолишда асослаб бериш ёки сотиш, принципи амал қилиши белгиланган.
Бозорда монопол мавқега эга, хусусий қўлга ўтганидан сўнг нарх-навони ошириш хавфи бўлган йирик 12 та тармоқ корхоналари кейинги босқичда алоҳида кўриб чиқилиши кўзда тутилмоқда. Бу Давлат активларини бошқариш агентлиги томонидан тайёрланган «Иқтисодиётда давлат улушини қисқартиришга доир қўшимча чора-тадбирлар тўғрисида»ги Президент қарори лойиҳасида кўзда тутилган. Агентлик ҳужжатни 12 мартгача танишиш ва фикр билдириш учун жамоатчилик муҳокамасига қўйган эди.
Изоҳ (0)