Тошкент шаҳар ИИББ фуқароларни фирибгарлик қурбони бўлмаслик учун бировларга ишониб, уларга пул беришга шошилмасликка ҳамда оғзаки келишувларни нотариус орқали тасдиқлатиб олишга чақирди.
Бошқарма фуқароларнинг оғзаки келишувлар асосида танишларига пул ва моддий бойликларини бериб, алданиб қолиш ҳолатларини мисол сифатида келтирди.
Жумладан, Юнусобод тумани ИИО ФМБга 30 ёшли Хуршид А. мурожаат қилган. Хуршид А. ўз аризасида 2019 йилнинг апрель ойидан май ойига қадар ҳамкорликда бизнес-лойиҳа ташкил этишни ваъда қилган ва ундан умумий нархи 684 719 АҚШ долларига тенг бўлган 5 788 та мобил телефонни олиб, уларни сотгач пулларни ўз эҳтиёжига сарфлаб юборган 43 ёшли Мақсадбек А.га нисбатан чора кўришни сўраган. Ушбу факт асосида Ўзбекистон Республикаси Жиноят кодексининг 168-моддаси (Фирибгарлик) бўйича жиноий иш қўғатилди.
Яна бир ҳолатда Учтепа тумани ИИО ФМБга 32 ёшли Абдуҳамид А. мурожаат қилган. У ҳам танишининг ёлғон гапларига ишониб, фирибгарлик қурбони бўлган. Унинг гапларига қараганда, 2019 йил 1 декабрь куни 39 ёшли Баҳром А. унга арзон нархда тилла тақинчоқлар олиб беришни ваъда қилган. Шу баҳона Баҳромдан 1900 АҚШ доллари олган. Аммо ваъда қилган ишини бажармаган ва пулларни қайтариб бермасдан, уларни ўз эҳтиёжига сарфлаб юборган. Баҳром А.га нисбатан Ўзбекистон Республикаси Жиноят кодексининг 168-моддаси (Фирибгарлик) бўйича жиноий иш қўзғатилди, дейилади хабарда.
Изоҳ (0)