FIFA 2025-yilgi Klublar o‘rtasidagi Jahon chempionati ochilish uchrashuviga bo‘lgan talabni oshirish maqsadida Mayami Deyd kollejining talabalari uchun maxsus chegirmali taklif taqdim etdi. The Athletic nashrining yozishicha, talabalar atigi 20 AQSh dollariga bitta chipta xarid qilish evaziga yana to‘rt donagacha bepul chipta olish imkoniyatiga ega bo‘lishadi.
Turnirning ochilish uchrashuvi 14-iyun kuni AQShning Mayami shahrida bo‘lib o‘tadi. Unda mezbon jamoa — Lionel Messi to‘p suradigan “Inter Mayami” Misrning nomdor klubi “Al-Ahli”ga qarshi maydonga tushadi. Uchrashuv 65 ming tomoshabinga mo‘ljallangan stadionda o‘tkaziladi.
Manbalarga ko‘ra, hozirgi kunga qadar taxminan 20 mingta chipta sotilgan. FIFA ilgari ushbu uchrashuvga chiptalar narxini ikki marta pasaytirgan: dastlabki narx 349 dollar bo‘lgan bo‘lsa, keyinchalik 230 dollarga tushirilgan, oxirgi bosqichda esa minimal narx 69 dollargacha pasaytirilgan. Talabalar uchun yangi chegirmali taklif turnirga bo‘lgan qiziqishni oshirish va stadionni to‘ldirishga qaratilgan navbatdagi tashabbus sifatida baholanmoqda.
Klublar o‘rtasidagi Jahon chempionati ilk bor kengaytirilgan formatda, ya’ni 32 ta jamoa ishtirokida o‘tkaziladi. Turnir davomida dunyoning eng kuchli klublari g‘oliblik uchun kurash olib boradi.
Izoh (0)