FIFA 2029-yildan boshlab Klublar o‘rtasidagi Jahon chempionatini 48 ta jamoaga kengaytirish masalasida muzokara olib bormoqda. Bu haqda Sport-Express nashri xabar berdi.
Manbaga ko‘ra, agar 2025-yilda AQSHda bo‘lib o‘tadigan turnir muvaffaqiyatli o‘tsa, FIFA 2029-yilgi musobaqani yanada kengroq formatda tashkil etish imkoniyatini ko‘rib chiqadi.
FIFA Yevropa klublari uchun hozircha 12 ta kvota ajratgan. Agar bu kvotani o‘zgarishni iloji bo‘lmasa, Yevropaning boshqa kuchli klublariga turnirda qatnashish imkoni bo‘lmaydi. Shuning uchun, FIFA 12 ta o‘rinni o‘zgartirmasa, bu qit’adagi yirik klublarni jalb qilishning yagona yo‘li — musobaqadagi jamoalar sonini ko‘paytirish bo‘ladi. Ayni paytda “Barselona”, “Arsenal”, “Liverpul”, “Manchester Yunayted” va “Milan” kabi nomdor klublar turnirda qatnashishga qiziqish bildirgan. Shu bois tashkilot jamoalar sonini oshirib, unga bo‘lgan e’tiborni yanada kuchaytirishni maqsad qilgan.
2029-yilgi turnirning formati va ishtirokchilarga oid muzokaralar 2025-yildagi chempionat yakunlangach, o‘tkazilishi kutilmoqda.
Eslatib o‘tamiz, 2025-yilgi Klublar o‘rtasidagi Jahon chempionati 14-iyundan 13-iyulgacha AQSHda bo‘lib o‘tadi. Unda 32 ta klub 8 ta guruhga bo‘lingan holda ishtirok etadi.
Izoh (0)