FIFA 2025 йилги Клублар ўртасидаги Жаҳон чемпионати очилиш учрашувига бўлган талабни ошириш мақсадида Майами Дейд коллежининг талабалари учун махсус чегирмали таклиф тақдим этди. The Athletic нашрининг ёзишича, талабалар атиги 20 АҚШ долларига битта чипта харид қилиш эвазига яна тўрт донагача бепул чипта олиш имкониятига эга бўлишади.
Турнирнинг очилиш учрашуви 14 июнь куни АҚШнинг Майами шаҳрида бўлиб ўтади. Унда мезбон жамоа — Лионель Месси тўп сурадиган “Интер Майами” Мисрнинг номдор клуби “Ал-Аҳли”га қарши майдонга тушади. Учрашув 65 минг томошабинга мўлжалланган стадионда ўтказилади.
Манбаларга кўра, ҳозирги кунга қадар тахминан 20 мингта чипта сотилган. FIFA илгари ушбу учрашувга чипталар нархини икки марта пасайтирган: дастлабки нарх 349 доллар бўлган бўлса, кейинчалик 230 долларга туширилган, охирги босқичда эса минимал нарх 69 долларгача пасайтирилган. Талабалар учун янги чегирмали таклиф турнирга бўлган қизиқишни ошириш ва стадионни тўлдиришга қаратилган навбатдаги ташаббус сифатида баҳоланмоқда.
Клублар ўртасидаги Жаҳон чемпионати илк бор кенгайтирилган форматда, яъни 32 та жамоа иштирокида ўтказилади. Турнир давомида дунёнинг энг кучли клублари ғолиблик учун кураш олиб боради.
Изоҳ (0)