Yevropa Ittifoqi mamlakatlari Rossiyaga qarshi 18-sanksiyalar paketini kelishib oldi. Bu haqda Yevropa diplomatiyasi rahbari Kaya Kallas ma’lum qildi.
Bu paket hozirgacha Rossiyaga nisbatan qabul qilingan “eng keskin sanksiyalar to‘plami” bo‘ladi. Uning doirasida “Shimoliy oqim” gaz quvurlari, shuningdek, Rossiya neftini tashiydigan 105 ta “soya floti” tankeri sanksiyalar ro‘yxatiga kiritiladi. Cheklovlar Hindistonda joylashgan “Rosneft”ga qarashli neftni qayta ishlash zavodiga ham ta’sir ko‘rsatadi.
Yevropa Ittifoqi Rossiya neft narxining yuqori chegarasini pasaytirish bo‘yicha ham kelishuvga erishgan. U bir barrel uchun 47,6 dollar bo‘lishi kutilmoqda. Bu cheklov Rossiya neftining Hindiston, Xitoy va Turkiya kabi davlatlarga eksportida qo‘llaniladi. Narx chegarasi ilk bor 2022-yilda AQSH, Kanada, Yaponiya va Buyuk Britaniya bilan hamkorlikda joriy etilgan. Unga amal qilmagan kompaniyalar sanksiyaga tortiladi.
Biz Rossiyaning harbiy sanoatiga bosimni kuchaytiramiz, shuningdek, sanksiyalarni chetlab o‘tishga ko‘maklashayotgan Xitoy banklariga nisbatan choralar ko‘ramiz. Bundan tashqari, dronlar uchun ishlatiladigan texnologiyalarning eksportini ham to‘xtatamiz, degan Kallas.
Yangi sanksiyalar paketi doirasida 22 ta bank SWIFT xalqaro to‘lov tizimidan uziladi, ularning moliyaviy operatsiyalariga to‘liq taqiq joriy etiladi. Yevropa Ittifoqi ilk bor sanksiyalarga bo‘ysunmaslikda ayblangan ikkita Xitoy banki bilan tranzaksiyalarni taqiqlamoqda.
Izoh (0)