Rossiya prezidenti Vladimir Putin 3-iyul kuni amerikalik hamkasbi Donald Tramp bilan bo‘lgan so‘nggi telefon suhbatida Ukrainaga yirik hujum boshlashidan ogohlantirgan. Bu haqda manbalarga tayanib, Axios xabar berdi.
Manbalarga ko‘ra, Putin kelgusi 60 kun ichida Ukrainaning qisman bosib olingan hududlarini to‘liq egallash uchun yirik hujumga o‘tishini aytgan. Shundan so‘ng Tramp fransiyalik hamkasbi Emmanuel Makron bilan suhbatlashgan. Muloqotda Putin Ukrainaning Lugansk, Donetsk, Zaporojye va Xerson viloyatlari ma’muriy chegaralari doirasida “hamma narsani egallab olishni xohlayotgani” ta’kidlangan.
Putin bilan muloqot asosida Tramp u jangovar harakatlarni to‘xtatish niyatida emasligiga ishongan. Bu AQSH prezidentining Ukrainaga harbiy yordam yuborish qaroriga ta’sir ko‘rsatgan. Jumladan, siyosatchi Ukrainaga Patriot raketalarini yuborishini ta’kidlagan.
Biz ularga juda zarur bo‘lgan Patriot’larni yuboramiz, chunki Putin haqiqatan ham ko‘pchilikni hayratda qoldirdi. U yaxshi gapiradi-yu, kechqurun hammani bombardimon qiladi...Biz ularga turli xildagi juda murakkab harbiy texnikalarni jo‘natmoqchimiz. Ular buning uchun bizga 100 foiz haq to‘laydi va biz aynan shuni xohlaymiz, degan Tramp.
AQSH prezidenti Kiyevga yuboriladigan qurollar uchun to‘lovni Yevropa Ittifoqi amalga oshirishini aytgan. U Ukrainaga qurol-yarog‘ yetkazib berishning yangi rejasini bugun e’lon qilishi kutilmoqda. Harbiy yordam tarkibiga uzoq masofali raketalar ham kirishi mumkin.
Tramp haqiqatan ham Putindan g‘azablangan. Uning 14-iyul kungi bayonoti juda keskin bo‘ladi, dedi Janubiy Karolinadan respublikachi senator Lindsi Grem.
Putin janglarda qisqa tanaffuslarga rozi bo‘lgan bo‘lsa-da, AQSHning shartsiz 30 kunlik o‘t ochishni to‘xtatish bo‘yicha takliflarini rad etgan. Rossiya bu taklif Kiyevga o‘z qo‘shinlarini safarbar qilish va qayta qurollanish imkoniyatini berishini bildirgan. Tramp Rossiya prezidenti urushni to‘xtatish bo‘yicha muzokaralardan bosh tortganidan “hafsalasi pir bo‘lgani”ni aytgan.
Izoh (0)