Yevropa Ittifoqi tashqi siyosat idorasi rahbari Kaya Kallas Isroilning G‘azo va bosib olingan G‘arbiy qirg‘oqdagi harakatlariga javoban jazolashning 10 ta ehtimoliy choralarini taklif etmoqda. Bu haqda Euronews xabar bermoqda.
Ma’lum qilinishicha, Ittifoqqa a’zo davlatlarning aksariyati hali variantlardan birortasini ham qo‘llab-quvvatlashga tayyor emas.
Taklif etilgan choralar orasida isroilliklar uchun Yevropa Ittifoqida vizasiz rejimni to‘xtatish, noqonuniy yahudiy qishloqlari mahsulotlarini import qilishni taqiqlash, siyosiy muloqotni to‘xtatish va Isroilning Yevropa Ittifoqi dasturlariga kirishini cheklash kabilar bor. Savdo imtiyozlarini to‘xtatish va havo qatnovi bo‘yicha kelishuvlar kabi ba’zi choralar ko‘pchilik tomonidan qabul qilinishi mumkin. Boshqa choralar uchun esa Yevropa Ittifoqi — Isroil assotsiatsiyasi to‘g‘risidagi bitimni to‘liq bekor qilish lozim. Buning uchun Yevropa Ittifoqining barcha 27 davlati bir ovozdan qo‘llab-quvvatlashi talab etiladi.
Ta’kidlanishicha, Kallas dastlab faqat beshta chora-tadbirni taklif etishni rejalashtirgan, ammo keyin ro‘yxatni o‘ntagacha kengaytirib, a’zo davlatlar Yevrokomissiya ishtirokisiz mustaqil ravishda amalga oshirishi mumkin bo‘lgan qadamlarni kiritgan.
Euronews’ning aniqlik kiritishicha, Yevropa Ittifoqi mamlakatlari hozircha harakat qilishga moyil emas. Boisi ko‘pchilik o‘tgan hafta Kallas vositachiligida erishilgan yangi gumanitar kelishuv natijalarini kutishni afzal ko‘rmoqda. Ushbu kelishuv doirasida Isroil Zikim chegara o‘tish punktini ochishga, yoqilg‘i yetkazib berishga ruxsat berishga va suv infratuzilmasini tiklashni boshlashga va’da bergan. Shuningdek, Iordaniya orqali yordam yetkazib berish yo‘nalishi qayta tiklangan. Biroq bularning barchasi dengizdan bir tomchi, xolos: Tel-Aviv hamon BMTga yordam tarqatishga ruxsat bermayapti.
Yevropa Ittifoqidagi mamlakatlarning fikrlar hali ham turlicha. Germaniya, Vengriya, Italiya va Chexiya G‘azodagi vaziyat yaxshilana boshlasa, sanksiyalar joriy etilishini qo‘llab-quvvatlamaydi. Shu bilan birga, Irlandiya va Ispaniya qat’iy harakatlar tarafdori. Irlandiyaliklar allaqachon Isroil qishloqlaridan importni tekshirishni boshlagan va Yevropa Ittifoqining noqonuniy ko‘chmanchilar mahsulotlarini sotib olishni taqiqlagan birinchi davlatiga aylangan.
Keyingi qadam qo‘yilishi yoki qo‘yilmasligi Isroilning erishilgan kelishuvlarni bajarishiga bog‘liq. Shu bilan birga, Tel-Aviv so‘nggi kunlarda G‘azodagi gumanitar vaziyat haqida qayg‘urish niyatida emasligini ko‘rsatmoqda.
Bundan avval Bryussel G‘azoda inson huquqlari buzilgani haqidagi ayblovlar ortidan Isroil bilan assotsiatsiya bitimini to‘xtatishga tayyorligi ma’lum qilingandi.
Izoh (0)