AQSH prezidenti Donald Tramp 12-iyul kuni mamlakatning eng yirik savdo hamkorlari bo‘lgan Meksika va Yevropa Ittifoqi mahsulotlariga 30 foiz boj solishini ma’lum qildi. Bu haqda CNN xabar berdi.
Tramp bu qaror haqida Truth Social tarmog‘ida post e’lon qilib, Yevrokomissiya rahbari Ursula fon der Lyayenga maktub yo‘llagan.
“AQSH Yevropa Ittifoqi bilan yirik savdo defitsitlariga ega bo‘lishiga qaramay, tashkilot bilan ishlashni davom ettirishga tayyor. Biz yanada muvozanatli va adolatli savdo bilan oldinga siljishga qaror qildik”, degan Tarmp.
AQSH prezidenti 7-iyuldan beri dunyo mamlakatlari mahsulotlariga 40 foizgacha savdo stavkalari joriy etib kelmoqda. YI va Meksikaga qo‘llanayotgan bojlar 1-avgustdan boshlab amal qiladi. Tramp ittifoq va Meksika rasmiylariga yo‘llagan maktubida barcha importlarga 30 fozilik tarif amal qilishi bildirilgan. Ammo “tarmoq tariflari”, jumladan, avtomobillarga qo‘yiladigan soliqlar bundan mustasno. Ularga 25 foizlik boj solinishi ta’kidlangan.
“YI eksportiga 30 foizlik boj solinishi Atlantikaning ikkala tomonidagi ta’minot zanjirlari, korxonalar va iste’molchilarga zarar yetkazadi. Tashkilot ittifoq manfaatlarini himoya qilish uchun barcha zarur choralarni ko‘radi. Shu jumladan, agar kerak bo‘lsa, mutanosib qarshi choralar ko‘riladi”, degan fon der Lyayen.
Fon der Lyayenga ko‘ra, AQSH tariflariga qarshi choralar, jumladan, 24,54 milliard dollarlik eksport avgust oyi boshigacha kechiktiriladi. Yevropa rasmiylari, shuningdek, Tramp bojlariga qarshi choralarning “ikkinchi ro‘yxatini” ishlab chiqqani ta’kidlangan.
Ayni paytda, Meksikadan keltirilgan mahsulotlar AQSHga bojsiz kirayotgandi. Bunga Trampning birinchi prezidentlik davrida kelishilgan “AQSH—Meksika—Kanada shartnomasi” sabab edi.
Tramp Meksika prezidenti Klaudiya Sheynbaumga yo‘llagan maktubida fentanilning Qo‘shma Shtatlarga kirib kelishini to‘xtatish maqsadida mamlakatga boj joriy etilganini aytgan.
“Meksika bizga chegarani qo‘riqlashda yordam berib keladi. AMMO uning bu ishi yetarli emas”, degan Tramp.
Meksika iqtisodiyot vaziri Marselo Ebrard 11-iyul kuni Qo‘shma Shtatlar bilan bo‘lgan yig‘ilishda yangi tarif stavkalari “adolatsiz” ekanini ta’kidlab, mamlakat bunga “rozi bo‘lmasligini” bildirgan.
Izoh (0)