Toshkent viloyatida fuqaroning odam savdosi qurboni bo‘lishining oldi olindi. Bu haqda viloyat IIBB matbuot xizmati xabar berdi.
Yangiyo‘l shahrida yashovchi, 1990-yilda tug‘ilgan ayol (Sh.Ch.) oson pul topish maqsadida o‘ziga tanish bo‘lgan, Sergelida yashovchi 33 yoshli ayol (M.A.)ni aldagan.
O‘tkazilgan tezkor tadbirda 35 yoshli yangiyo‘llik ayol tanishini mo‘may daromad topishga ishontirib, Toshkent xalqaro aeroporti orqali Moskvaga shahvoniy ekspluatatsiya — fohishalik uchun jo‘natayotgan vaqtida daliliy ashyolar bilan ushlandi.
Holat yuzasidan ushlangan shaxsga nisbatan Jinoyat kodeksining 135-moddasi (Odam savdosi) bilan jinoyat ishi qo‘zg‘atilgan. Tergov harakatlari olib borilmoqda.
Maʼlumot uchun, odam savdosi jinoyatini sodir qilganlar 5 yilgacha ozodlikni cheklash yoki 15 yilgacha ozodlikdan mahrum qilish bilan jazolanishi mumkin.
Bunday holatlar soni ortib bormoqda
Mart oyida Toshkentda 22 yoshli ayol ikki tengdoshini Rossiyaga sotib yuborayotganda qo‘lga olingandi. Iyun oyida Toshkent viloyatida qizlarni fohishalik uchun Turkiyaga jo‘natayotgan ayol ushlandi.
Avgustda esa Toshkent aeroportida 20 yoshli qizni aldab, Dubayga fohishalikka yuborayotgan erkak ushlangandi.
Shuningdek, Toshkent xalqaro aeroportida ayol Turkiyaga 20 yoshli qizni fohishalik uchun jo‘natayotgan vaqtda ushlangan.
Izoh (0)