Iyun oyi tugab, yozning jazirama iyuli ham boshlandi. Janubiy Koreya kinemotografiyasida bu oyda qanday yangi filmlar premyera qilinishi haqida ma’lumot beramiz.
“Chxondam xalqaro litseyi 2”
Premyera: 3-iyul
Birinchi mavsumda nufuzli Chxondam litseyiga kelgan va Pek Je Na bilan ziddiyatga borgan Kim Xe In qiynoqlarga dosh berib, o‘z tanlovini amalga oshirdi. Yangi mavsumda sobiq dushmanlar yana murakkab vaziyatga tushib qolishadi, chunki o‘tmishda oshkor bo‘lgan haqiqat maktabdagi mavjud tizimni izdan chiqaradi. Buning ustiga, Chxondam litseyiga kelgan yangi o‘quvchi shundoq ham chigal vaziyatni yanada murakkablashtiradi. Endi Xe In va Je Na o‘z qarorlariga sodiq qolishlari yoki hayotga bo‘lgan qarashlarini o‘zgartirishlari lozim.
“Socho tumani”
Premyera: 5-iyul
An Ju Hyun katta obro‘ga ega bo‘lgan mashhur va talabgir huquqshunos. U bu kasbni bejiz tanlamagan. Ju Hyun bolaligidanoq mantiq va sabab-oqibat bog‘liqligiga qiziqib kelgan. Biroq ko‘plab muvaffaqiyatli ishlarga qaramay, atrofdagilar uni hamon sovuqqon va jabrlanganlarga befarq odam deb hisoblashadi. An ortiqcha tashvishlardan qochish maqsadida shaxsiy advokaturasini ochishni rad etadi. Ammo yosh huquqshunos Kang Hi Ji bilan tanishuvi uning ish va hayotga bo‘lgan qarashlarini o‘zgartirishga majbur qiladi. Endi Ju Hyun Hi Ji va yana bir necha hamkasblari bilan nafaqat sudda murakkab ishlarni olib boradi, balki ish doirasidan tashqarida ham do‘stona munosabatlar o‘rnatadi.
“Bolalar savdosi”
Premyera: 21-iyul
Kim Se Xi — shifoxona va xayriya jamg‘armasi rahbari. Atrofdagilar nazarida u bolalarga g‘amxo‘rlik qiladigan olijanob ayol, aslida esa bu xonim chin ma’noda yovuzlikning o‘zi. Ko‘p yillar davomida u chaqaloqlarni boy oilalarga sotib kelgan, agar bolalar keyinchalik farzandlikka olganlarning ko‘nglini qoldirsa, ularni yo‘q qilish uchun qaytarib olgan. Se Xi o‘z hayotidan mamnun, uning yordamchilaridan biri — U Te Shik bolalarni qutqarib, ko‘chalarda yashab qolishlariga yordam berayotganidan bexabar. Aynan shu odam Se Xi qaytargandan keyin tirik qolgan va endi bu dahshatli ayoldan o‘ch olish rejasini pishirayotgan qiz Kim A Xyon bilan tanishadi.
“Biz mo‘jiza yaratamiz”
Premyera: 25-iyul
Ju Ga Ram regbi bo‘yicha milliy terma jamoa a’zosi bo‘lib, uning istiqboli porloq edi. Biroq taqiqlangan moddalar bilan bog‘liq mojarosi tufayli u katta sport olamini tark etishga majbur bo‘ladi. U uch yil yolg‘iz o‘zi yashaydi va sportga qaytishga qaror qiladi. Endi Ga Ram mahalliy sport maktabida regbi bo‘yicha murabbiylik qilmoqda — uning jamoasi ligada eng quyi o‘rinni egallab turibdi. Biroq janob Ju bu vaziyatni tubdan o‘zgartira olishiga qat’iy ishonch bildirmoqda.
“Yaxshi bola”
Premyera: 18-iyul
Pak Sok Chxol atrofdagilar “yaxshi bola” deb ataydigan mashhur gangsterning kenja nabirasi. Akalari va boshqa qarindoshlaridan farqli o‘laroq, u mafiya hayotini yoqtirmaydi, biroq o‘ziga yuklatilgan vazifalarni bajarishga majbur. Sok Chxol to‘dadan chiqib ketishni istaydi va o‘zining birinchi sevgilisi — endigina qo‘shiqchilik faoliyatini boshlagan Kan Mi Yon bilan oila qurishni orzu qiladi. Ammo buning uchun u so‘nggi topshiriqni bajarishi kerak.
“Jinoiy elementlar”
Premyera: 16-iyul
1970-yillarda Sinan atrofida mahalliy aholi oltin vasvasasiga uchraydi. O Gvan Sok boshchiligidagi guruh cho‘kkan kemani topib, undagi oltinni topishga ahd qiladi. Mahalliy aholi xazina barcha muammolarini hal qilib, yangi hayot boshlashga imkon berishiga umid bog‘lagan edi. O Xi Don amakisi Gvan Sokka yordam berishga qaror qilib, u bilan birga safarga otlanadi. Biroq oltin qidiruviga qancha ko‘p vaqt sarflansa, jamoa a’zolari orasidagi munosabatlar shunchalik taranglashib boradi va oxir-oqibat ular murakkab tanlov oldida qoladi — xazinami yoki insoniylik?
Izoh (0)