Ekvadorda mashhur “Los Choneros” jinoiy to‘dasi rahbari “Fito” taxallusi ostidagi Xose Adolfo Makias 25-iyun kuni qo‘lga olindi. Bu haqda Al Jazeera xabar berdi.
U giyohvand moddalar savdosi va qurol-yarog‘ kontrabandasi ayblovi bilan AQSHga topshirilishi kutilmoqda. “Fito”ning qo‘lga olingani haqida Ekvador prezidenti Daniel Noboa ma’lum qilgan. “Fito” giyohvand moddalar savdosi va qotillik uchun 34 yillik qamoq jazosiga hukm qilingandi. Biroq u 2024-yil yanvar oyida Guayakil qamoqxonasidan qochib ketgan.
Shundan so‘ng, uni qo‘lga olishga yordam berganlarga 1 mln dollar mukofot e’lon qilingan. “Fito”ni topish uchun minglab politsiya va qurolli kuchlar vakillari jalb qilingan.
“Ushbu operatsiyada ishtirok etgan politsiya va harbiylarimizga minnatdorlik bildiraman. Mamlakatni qayta tiklaymiz. Hech qanday avf yo‘q”, dedi Noboa.
Makias qattiq rejimli qamoqxonaga o‘tkazilishidan oldin qochib ketgan, biroq rasmiylar bu qanday amalga oshganini ma’lum qilmagan. Uning qochishi mamlakatda keng ko‘lamli tartibsizlik, portlash, odam o‘g‘irlash, taniqli prokurorning o‘ldirilishi va jonli efir paytida televideniye tarmog‘iga qurolli hujumga sabab bo‘lgandi. Shundan so‘ng, prezident Ekvador bo‘ylab 60 kunlik favqulodda holat e’lon qilgandi.
Shuningdek, Ekvador prezidenti 22 ta to‘dani, jumladan “Los-Choneros”ni “terrorchilik guruhlari” deb atagan. AQSH Moliya vazirligi 2024-yil fevral oyida Makias va “Los-Choneros”ni Ekvador bo‘ylab giyohvand moddalar savdosi va zo‘ravonlikni qo‘zg‘atgani uchun sanksiya kiritgan.
Bir paytlar Ekvador Lotin Amerikasining eng tinch davlatlaridan biri bo‘lgan. Ammo mamlakatning dunyodagi eng ko‘p kokain ishlab chiqaruvchi Peru va Kolumbiyaga yaqinligi uni xorijga giyohvand moddalar eksport qiluvchi jinoiy guruhlar uchun asosiy nishonga aylantirgan.
Izoh (0)