Samarqand viloyati Kattaqo‘rg‘on tumanida 15 yoshli jiyanini 50 mln so‘mga sotayotgan ayol 20 mln so‘m olayotgan vaqtida jinoyat ustida ushlandi. Bu haqda viloyat IIB xabar berdi.
Ma’lum qilinishicha, fuqaro viloyat IIB boshlig‘i nomiga ariza bilan murojaat qilib, Kattaqo‘rg‘on tumanida yashovchi ikki ayol 15 yoshli bolani 50 mln so‘mga sotmoqchi bo‘lib, pul talab qilayotganini aytgan.
Mazkur ariza asosida 11-iyun kuni Samarqand tumani ichki ishlar bo‘limi tezkor qidiruv xizmati, jinoyat qidiruv bo‘linmasi hamda DXX xodimlari hamkorligida o‘tkazilgan tezkor qidiruv davomida ayollardan biri 20 mln so‘m olayotgan vaqtida qo‘lga olindi. U O‘zbekiston bolalar mahallalari uyushmasi Samarqand filialida tarbiyalanayotgan jiyanini sotmoqchi bo‘lgan.
Holat bo‘yicha Jinoyat kodeksining 135-moddasi (odam savdosi) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval ham shu kabi holat kuzatilgan. Qashqadaryoda er-xotin uy olish maqsadida bir haftalik chaqalog‘ini 190 mln so‘mga pullagani haqida xabar berilgandi. Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani haqida xabar berilgandi.
Izoh (0)