Braziliya prokuraturasi Xitoyning avtomobil ishlab chiqaruvchi BYD kompaniyasini mehnat huquqlarini buzganlikda ayblab sudga berdi. Bu haqda CNN xabar berdi.
Xitoy kompaniyasi Braziliyada avtomobil zavodini qurmoqda. Unga jalb qilingan ishchilar “qullikka o‘xshash sharoitlarda” faoliyat yuritgani ma’lum qilingan. Braziliya Mehnat prokuraturasiga ko‘ra, da’vo BYD va uning ikkita pudratchisi — JinJiang va Tecmonta kompaniyalaridan 45 million dollar miqdorida ma’naviy zarar undirishni nazarda tutadi. Bundan tashqari, ishchilarga alohida kompensatsiya to‘lashni talab qiladi.
BYD kompaniyasi bunga javoban inson huquqlariga sodiqligini va Braziliya hamda xalqaro mehnat qonunlariga hurmat bilan yondashishini bildirgan. Kompaniya prokurorlar bilan hamkorlik qilayotgani va sudga rasmiy hujjatlar orqali javob berishini ta’kidlagan.
Braziliya prokuraturasi dekabr oyida Baiya shtatida BYD pudratchilari tomonidan yollangan 220 nafar xitoylik ishchi “qullikka o‘xshash sharoitlarda” ishlayotganini aniqlagan. Prokurorlarga ko‘ra, ular xalqaro odam savdosi qurbonlari ham bo‘lgan.
Mehnat prokurori o‘rinbosari Fabio Leal uchta kompaniya bilan muzokaralar dekabr oyi oxirida boshlangani, biroq kelishuvga erishilmaganini aytgan. U muzokaralarning muvaffaqiyatsiz yakunlangani sabablarini ochiqlamagan.
Lealning ta’kidlashicha, ishchilar Braziliyaga noqonuniy olib kelingan va ularga va’da qilingan mehnat sharoitlari yaratilmagan. Hozirda Xitoyga qaytib ketgan ishchilar u yerdagi da’vo bo‘yicha to‘lovlarni oladi. Braziliyadagi kompaniyalar esa to‘lovlarni tasdiqlovchi hujjatlarni taqdim etishi shart bo‘ladi. Leal kelishuvga erishish mumkinligini, ammo uni sud orqali hal qilish kerakligini aytmoqda.
Bizning da’vo arizamiz juda asosli, tergov jarayonida ko‘plab ishonchli dalillar to‘plangan, degan u.
BYD dunyodagi eng yirik elektromobil ishlab chiqaruvchilardan biri hisoblanadi. Kompaniya Tesla’ning asosiy raqobatchilaridan biri sanaladi. BYD mahsulotlarini dunyoning 70 dan ortiq mamlakat va hududlarida sotadi.
Izoh (0)