27-iyun kuni “Kalmar o‘yini” serialining uchinchi mavsumi namoyish etildi. Tomoshabinlar loyiha nihoyasiga yetganiga hanuz ishonmayapti va serial davomiga oid turli ma’lumotlarni internetdan izlamoqda. Bu orada rejissyor va ssenariy muallifi Xvan Don Xyok o‘z loyihasi bilan xayrlashganini ma’lum qildi.
“Ikkinchi va uchinchi mavsum uchun syujet hikoyalarini ishlab chiqayotganimda nafaqat o‘yinga yakun yasaydigan, balki Gi Xun hikoyasini ham to‘liq tugatadigan yechim topish zarurligini angladim. Uning bu mashaqqatli yo‘li asosiy g‘oyani aniq ifodalovchi tarzda yakunlanishi muhim edi”, dedi u Netflix bilan suhbatda.
Rejissyor so‘zlariga ko‘ra, serialning bosh g‘oyasi — insonlarni osonlik va tezlik bilan daromad orttirishga intilish o‘rniga hamkorlikka undashdir. Faqat shundagina jamiyatda yorug‘ kelajak uchun imkoniyat bo‘ladi.
Don Xyok final unga bir vaqtning o‘zida ham quvonch, ham g‘am ulashganini tan oldi. U “Kalmar o‘yini”ni suratga olish jarayonida yaqindan ishlagan butun jamoa bilan xayrlashayotganidan afsusda ekanini yashirmadi.
Biroq muxlislar uchun hali ham umid bor. Avvaliga rejissyor birinchi fasldan keyin davomi bo‘lmasligini ta’kidlagan edi, ammo yana ikki fasl suratga olindi.
Bundan tashqari, Xvan spin-off, ya’ni alohida voqealarni yoritadigan serial ustida ishlashga qarshi emasligini ham ochiq aytgan. U hatto asosiy mavsumlar voqealari orasidagi vaqt oralig‘ini belgilab, yangi syujet aynan shu davrda sodir bo‘lishi mumkinligini bildirgan.
Izoh (0)