Netflix tomonidan 2021-yilda namoyish etilgan “Kalmar o‘yini” seriali qisqa vaqt ichida global miqyosda mashhurlikka erishdi. Janubiy Koreyada suratga olingan bu loyiha jamiyatdagi tengsizlik, omon qolish uchun kurash va murakkab tanlovlar mavzusini ko‘tarib chiqdi. Serialdagi har bir sahna sinchkovlik bilan yaratilgandek tuyuladi.
Uchinchi mavsum premyerasi joriy yil 27-iyun kuni namoyish etiladi, biroq birinchi mavsumdagi bir sahna hanuzgacha tomoshabinlar uchun jumboq bo‘lib qolmoqda.
Gap Han Mi Nyo ismli qahramon haqida ketmoqda. Uning xarakteri serialda yolg‘onchi, ayyor va faqat o‘z foydasini o‘ylaydigan bo‘ladi. “Kalmar o‘yini”da u qo‘riqchilardan tungi damdan keyin hojatxonaga chiqishga ruxsat so‘raydi. Aynan shu vaqtda muxlislar “mavsumdagi eng tushunarsiz epizod” deb atagan voqea yuz beradi.
Han Mi Nyo dugonasi bilan ventilyatsiya shaxtasiga chiqib oladi. U yerda xodimlar kelgusi o‘yin uchun shakardan maxsus pechenyelar tayyorlayotganini ko‘radi. Mi Nyo zudlik bilan qaytadi va bu ma’lumotdan o‘z manfaati yo‘lida foydalanadi.
Ammo tomoshabinlarda darrov savol tug‘iladi: qanday qilib bu narsa sodir bo‘ldi? Nega qo‘riqchilar bu harakatga to‘sqinlik qilishmadi? Kameralar yo‘qmidi? Axir har bir harakat nazorat qilinadigan joyda hattoki hojatxonada ham videokuzatuv qo‘yilishi kerak emasmi?
Ba’zilar bu holatni oddiy ssenariy xatosi deb hisoblaydi. Ularning fikricha, bu darajadagi yirik va qattiq nazorat ostidagi o‘yinda kuzatuv kameralari har joyda bo‘lishi shart edi. Biroq boshqa bir guruh tomoshabinlar bu tasodif emas, balki rejissyorlar tomonidan ataylab kiritilgan sahna, deb hisoblaydi. Ularning fikricha, serial homiylari uchun eng muhim narsa bu — intriga va tomoshaboplik. Agar ishtirokchi qoidani buzsa yoki aldasa, bu voqealarning yanada qiziqarli va hayajonli tus olishiga sabab bo‘ladi.
Izoh (0)