Eron yaqin haftalar ichida Tehron va BMTning yadro nazorati organi o‘rtasidagi hamkorlikning yangi shaklini muhokama qilish uchun Xalqaro atom energiyasi agentligi (MAGATE) texnik missiyasini qabul qilishga rozilik bildirdi. Bu haqda Eron tashqi ishlar vaziri o‘rinbosari Kozim G‘aribobodiy Nyu Yorkka tashrifi chog‘ida ma’lum qildi.
U jurnalistlarning savollariga javob berar ekan, delegatsiya Eronga (yadro) obyektlarini ko‘zdan kechirish uchun emas, balki ushbu hamkorlik shaklini muhokama qilish maqsadida tashrif buyurishini bildirgan.
Shuningdek, G‘aribobodiy Eronning o‘z ehtiyojlarini qondirish uchun uran boyitish ishlarini mustaqil ravishda amalga oshirish niyatida ekanligini va bu masalada boshqalarga tayanib bo‘lmasligini ta’kidlagan.
“Uran boyitish masalasiga kelsak, Eron o‘z ehtiyojlariga muvofiq uranni boyitadi. Men shuni ayta olaman. Biz o‘zimizga zarur bo‘lgan barcha ishlarni qila olishimiz kerak... Bu borada bizda juda achinarli tajriba mavjud. Biz tashqi ijrochiga suyana olmaymiz”, dedi u.
2-iyul kuni Eron prezidenti Mas’ud Pezeshkiyon Tehron va MAGATE o‘rtasidagi hamkorlikni to‘xtatish to‘g‘risidagi qonunni imzoladi. Hujjat prezident tomonidan imzolangan paytdan boshlab qonunan kuchga kirgan va bajarilishi majburiy hisoblanadi.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)