Fransiya Isroilni ommaviy ocharchilikni keltirib chiqarishda ayblamoqda

Fransiya Tashqi ishlar vazirligi G‘azo sektoridagi to‘yib ovqatlanmaslik va “ochlik xavfi” Isroil tomonidan o‘rnatilgan qamalning bevosita oqibati ekanligini ma’lum qildi. Bu haqda mintaqadagi insonparvarlik vaziyati yomonlashganiga izoh bergan vazirlik rasmiy vakili xabar berdi.

“Fransiya Isroilning G‘azo markaziga hujumini kengaytirishini qat’iyan qoralaydi. U yerdagi ko‘chirish buyruqlari Deyr al-Balah shahrida o‘n minglab odamlarning boshpanasiz qolishiga olib keldi. Yangi harbiy amaliyot to‘yib ovqatlanmaslik va ochlik xavfi bilan tavsiflanayotgan insonparvarlik vaziyatining yomonlashishini tezlashtirmoqda”, deya ta’kidladi vazirlik vakili.

Uning so‘zlariga ko‘ra, joriy haftada Isroilning G‘azodagi harbiy harakatlarining kuchayishi mahalliy aholining ahvolini keskin yomonlashtirmoqda. Falastin hududida o‘rnatilgan insonparvarlik qamali esa oziq-ovqat bilan bog‘liq jiddiy muammolarga va ommaviy ochlik xavfiga sabab bo‘lmoqda.

Fransiya hukumati G‘azodagi fojiali insonparvarlik vaziyatidan tashvishga tushib, Isroil tomonidan joriy etilgan cheklovlar inqirozning asosiy sababi ekanini ta’kidlamoqda. Vazirlik aholi turmush sharoitining yana-da yomonlashishiga yo‘l qo‘ymaslik uchun zudlik bilan choralar ko‘rishga chaqirdi.

“Ushbu ahvol Isroil tomonidan o‘rnatilgan qamal natijasida yuzaga kelgan. Fransiya Isroilning G‘azoda insonparvarlik yordami olishga urinayotgan falastinliklarni o‘qqa tutishini qat’iyan qoralaydi. BMT ma’lumotlariga ko‘ra, so‘nggi ikki oy ichida mingdan ortiq odam halok bo‘lgan”, deya ta’kidlaydi vazirlik vakili.

Fransiya TIV mas’uli Parij vaziyatdan kelib chiqib qanday aniq qadamlar qo‘ymoqchi ekaniga oydinlik kiritmagan, biroq qamal tufayli yuzaga kelgan muammoni hal qilish zarurligini alohida ta’kidlagan.

Iyul oyi boshida Fransiya prezidenti Emmanuel Makron Buyuk Britaniyaga uch kunlik davlat tashrifi chog‘ida Britaniya parlamentida so‘zlagan nutqida Falastin davlatini tan olishga chaqirdi va G‘azodagi urushni “cheksiz va strategik maqsadsiz” deb atadi.

“Siyosiy yechim - tinchlikka olib boradigan yagona yo‘l va men Falastin davlatining tan olinishiga ishonaman”deya ta’kidladi Makron.