O‘zbekiston pasporti jahonda o‘z mavqeyini yaxshiladi

Henley Passport indeksi dunyoning eng kuchli pasportlari reytingini yangiladi. Unda O‘zbekiston pasporti 74-o‘rinda qayd etilgan.

O‘zbekiston va Markaziy Osiyo

Nashr ma’lumotlariga ko‘ra, O‘zbekiston pasporti egalari 62 ta mamlakatga vizasiz kira oladi (Nashr Ummon davlati O‘zbekiston fuqarolari uchun vizasiz rejimni joriy qilganini inobatga olmagan — “Daryo” izohi).

Mamlakat 2024-yilda 80-o‘rindan joy olgandi. Mintaqa davlatlari ichida Qozog‘iston fuqarolarining pasporti eng kuchlisi deb topildi. Qo‘shni respublika fuqarolari 79 ta davlatga vizasiz kira oladi.

Markaziy Osiyo davlatlarining reytingdagi o‘rni quyidagicha:

• Qozog‘iston – 63-o‘rin (79 ta davlatga vizasiz rejim);
• Qirg‘iziston – 73-o‘rin (63 ta davlatga vizasiz rejim);
• O‘zbekiston – 74-o‘rin (62 ta davlatga vizasiz rejim);
• Tojikiston – 80-o‘rin (56 ta davlatga vizasiz rejim);
• Turkmaniston – 85-o‘rin (49 ta davlatga vizasiz rejim).

Reytingda birinchi o‘rin Singapurga tegishli. Osiyo davlati ketma-ket ikkinchi yil pasport bo‘yicha reytingni boshqarib kelmoqda. Mamlakat o‘z fuqarolariga 193 ta davlatga vizasiz kirish imkoniyatini yaratgan. Ikkinchi o‘rinda Yaponiya va Janubiy Koreya joylashgan. Ushbu davlatlar fuqarolari 190 ta mamlakatga vizasiz bora oladi. Undan keyingi pog‘onalar Yevropa mamlakatlari tomonidan band qilingan.

Yevropa Ittifoqining 7 ta davlati — Daniya, Finlyandiya, Fransiya, Germaniya, Irlandiya, Italiya va Ispaniya — 189 davlatga vizasiz kirish imkoniyati bilan dunyoda uchinchi o‘rinni egallagan. To‘rtinchi o‘rin esa Avstriya, Belgiya, Lyuksemburg, Niderlandiya, Norvegiya, Portugaliya va Shvetsiyaga nasib etgan. Ushbu mamlakat fuqarolari dunyo bo‘ylab 188 ta davlatga viza muammolarisiz bora oladi. Gretsiya, Shveysariya va Yangi Zelandiya kuchli beshlikni yakunlab bergan.

Umumiy olganda, Yevropaning 28 mamlakati Shengen vizasi va kuchli diplomatik munosabatlar tufayli reytingda 10 talikka kira olgan.

O‘zbekistonliklar qaysi davlatga vizasiz bora oladi?

O‘zbekiston fuqarolari quyidagi davlatlarga vizasiz borish imkoniyatiga ega.

2024-yilda O‘zbekiston fuqarolari uchun BAA, Tailand va Ummonda vizasiz bo‘lib turish huquqi berilgan. 2025-yil 1-iyundan boshlab Xitoyga vizasiz borish imkoniga ega bo‘lgan. Rossiyaga kelayotgan O‘zbekiston fuqarolari 2025-yil 30-iyundan boshlab “Gosuslugi RuID” mobil ilovasi orqali oldindan ro‘yxatdan o‘tishi belgilandi.

Keniya, Seyshel orollari, Shri Lanka hamda Rossiya davlati sayohatdan oldin elektron tarzda tasdiqlanadigan kirish ruxsatnomasi talab qiladi.

Ro‘yxatda keltirilgan 28 mamlakatga kelgan O‘zbekiston fuqarolari aeroportda viza olishi talab qilinadi.