Shimoliy Atlantika alyansining Rossiya va Xitoy bilan urushi 2027-yilda boshlanishi mumkin. Bu haqda NATOning Yevropadagi birlashgan qurolli kuchlari yangi bosh qo‘mondoni, amerikalik general-leytenant Aleksis Grinkevich ma`lum qildi, deya xabar bermoqda The Guardian.
“Barchamiz ikki yildan keyin keladigan 2027-yil haqida eshitganmiz. Bizning fikrimizcha, aynan o‘sha paytda Si Szinpin harakatga o‘tib, Putinga qo‘ng‘iroq qilishi mumkin”, dedi general-leytenant.
Grinkevichning aytishicha, Pekin Tayvan atrofidagi hududda operatsiya boshlamasdan oldin o‘z harakatlarini Moskva bilan oldindan kelishib olishi ehtimoldan xoli emas.
“Shu sababli NATO bunday voqealar rivojiga tayyor turishi va barcha zarur resurslarga ega bo‘lishi lozim”, deydi Grinkevich.
Iyul oyi boshida NATO bosh kotibi Mark Ryutte New York Times gazetasiga, agar Xitoy raisi Si Szinpin Tayvanga hujum qilishga qaror qilsa, Rossiya va Xitoyning harbiy hamkorligi rejasi qanday bo‘lishi haqida o‘z fikrlarini bildirgan edi. Uning ta’kidlashicha, Xitoy rahbari birinchi bo‘lib Rossiya prezidenti Vladimir Putinga qo‘ng‘iroq qilib, go‘yoki NATOni chalg‘itishni so‘raydi.
Bundan avval NATO bosh kotibi Mark Ryutte agar Hindiston, Xitoy va Braziliya Rossiya bilan savdoni davom ettirsa, AQSHning ikkilamchi sanksiyalari tufayli jiddiy oqibatlarga yuzlashishidan ogohlantirgandi.
Izoh (0)