Buyuk Britaniya va Fransiya Ukraina dengiz hamda havo hududini birgalikda nazorat qilish uchun qo‘shma koalitsiya tuzdi. Bu Rossiya o‘t ochishni to‘xtatish rejasiga rozi bo‘lgan taqdirda amalga oshadi.
Buyuk Britaniya bosh vaziri Kir Starmer va Fransiya prezidenti Emmanuel Makron “Ukraina ko‘p millatli kuchlari” koalitsiyasi tuzilganini e’lon qilgan. Ushbu tashabbus doirasida ikki davlat ukrainalik harbiylarni o‘qitish bilan shug‘ullanadi. Rejaga ko‘ra, koalitsiya shtab-kvartirasi dastlab Parijda joylashadi, keyinchalik Londonga ko‘chiriladi.
O‘n minglab yevropalik harbiylardan iborat kontingent Ukraina shaharlari va muhim infratuzilma obyektlari, jumladan, atom elektrostansiyalarini himoyalash uchun yagona tuzilmaga — “Iroda koalitsiyasi”ga birlashadi. Ushbu reja dastlab NATO bilan nizo keltirib chiqarishi ehtimoli sabab barbod bo‘lgan edi.
Ukraina chegaralarini himoyalash tashabbusi Buyuk Britaniya mudofaa vaziri Jon Hilining shu hafta bergan bayonotiga zid keladi. Unda ikki davlat Ukrainani qo‘llab-quvvatlash uchun harbiy kuchlarni qanday ta’minlashi bayon etilgandi. Reja bo‘yicha, britaniyalik askarlar Ukrainaga yuborilishi lozim edi.
Times radiosi jurnalistlari Hilidan “Bu rejada hali ham Ukrainaga qo‘shin yuborish nazarda tutilganmi?”, deb so‘radi. Hili esa, “Ha. Bosh vazir har doim o‘t ochishni to‘xtatish uchun Ukrainaga qo‘shin kiritishga tayyor”, deya javob qaytardi.
Emmanuel Makron bilan Kir Starmer koalitsiya borasida xabar berish uchun matbuot anjumani uyushtirgan.
Biz hozirgina ilk bora AQSH vakillarini o‘z ichiga olgan “Iroda koalitsiyasi” yig‘ilishiga hamraislik qildik. Shtab-kvartirasi Parijda joylashgan “Ukraina ko‘p millatli kuchlari” rejasi e’lon qilindi. Biz tinchlik bitimini qo‘llab-quvvatlashga tayyormiz. Putin tinchlikdan yuz o‘girayotgan bir paytda, biz ukrain xalqini himoya qilish va Putinni o‘t ochishni to‘xtatishga ko‘ndirish uchun Ukrainani ko‘proq qo‘llayapmiz, degan Starmer.
Tinchlik sulhiga erishilgach, Buyuk Britaniya va Fransiya boshchiligidagi koalitsiya Ukraina qurolli kuchlarini tiklashga yordam berish uchun Kiyevga harbiy instruktorlar va logistika mutaxassislarini yuborishni rejalashtirgan. Koalitsiya samolyotlari Ukraina havo kuchlari bilan hamkorlikda mamlakat havo hududini qo‘riqlab, tijoriy parvozlarni qayta yo‘lga qo‘yadi.
Qora dengizda esa Turkiya, Bolgariya va Ruminiya boshchiligidagi harbiy-dengiz kuchlari mamlakatni minalardan tozalab, Ukraina portlariga yuk tashish yo‘llarini himoya qiladi. Ammo Makron “Fransiya-Britaniya” koalitsiyasi Ukrainaga yuborilgan boshqa Yevropa qo‘shinlarini himoya qilmasligini bildirgan.
Izoh (0)