Berlin endilikda ittifoqchisi Kiyevni ballistik raketalarga qarshi Patriot tizimi uchun raketalar bilan AQSHdan mustaqil ravishda taʼminlay oladi. Boisi mamlakat ularni mahalliy ishlab chiqarishni boshladi.
Bu haqda Germaniyaning Ukraina bo‘yicha yordam tashabbuslarini muvofiqlashtiruvchi general Kristian Freuding bayonot berdi. Biroq Germaniya Ukrainaning ehtiyojlarini to‘la qondira oladimi yoki bu AQSH yordamiga to‘ldiruvchi bo‘ladimi, hozircha nomaʼlum.
Germaniyalik qo‘mondon bundan tashqari, uzoq masofaga zarba bera oladigan qurollar zaruratini ham taʼkidladi.
“Bizga Rossiya hududining ichkarisiga kirib borib, omborlar, qo‘mondonlik punktlari, aerodromlar va samolyotlarni nishonga oladigan qurol tizimlari zarur”, degan u.
Xabar qilinishicha, Germaniyada ishlab chiqarilgan Patriot raketalari Ukrainaga 2026–2027-yillarda yetkazib beriladi. Berlin ittifoqchisini bunday qurol tizimlari bilan taʼminlashga tayyorligini bildirdi.
Biroq general Freudingning so‘zlariga ko‘ra, Germaniya Ukrainaga uzoq masofali zarbdor qurollarni shu oy oxirigacha yetkazib bera boshlaydi. Bu ikki davlat Mudofaa vazirliklari may oyida kelishgan bitim doirasida amalga oshiriladi.
“Bu yaqin haftalar va oylar ichida Ukrainaning havo mudofaasi va jangovar salohiyatini sezilarli darajada kuchaytiradi”, dedi u.
2025-yil uchun Ukrainaga harbiy yordam
NATO sammitida qabul qilingan qarorga ko‘ra, 2025-yilda Ukrainaga ajratiladigan harbiy yordam 50 milliard yevrodan oshadi. Mablag‘lar, jumladan, Ukraina qurolli kuchlari uchun sun’iy yo‘ldosh aloqalarini qo‘llab-quvvatlashga yo‘naltiriladi. Norvegiya esa Ukrainaga dronlar uchun 640 million yevro miqdorida mablag‘ ajratishini va’da qilgan.
Shunga qaramay, Germaniya Mudofaa vazirligi Ukrainaga ajratilishi rejalashtirilgan harbiy yordam byudjetida deyarli 1 milliard yevro kamomad yuzaga kelganini qayd etdi.
Mudofaa vaziri Boris Pistorius yordam hajmi 9,2 milliard yevro bo‘lishini bildirgan edi, biroq keyinchalik rasmiy byudjet loyihasida bu raqam 8,3 milliard yevroga tushib qolgani ma’lum bo‘ldi.
Izoh (0)