AQSH NATO ittifoqchilariga taxminan 10 milliard dollarlik qurol-yarog‘ sotishni rejalashtirmoqda. Bu haqda manbalarga tayanib, Axios xabar berdi.
Prezident Donald Tramp alyans bosh kotibi Mark Ryutte bilan uchrashuvda NATO hamkorlariga “eng zamonaviy qurollarni” yuborish niyatida ekanini aytgan. Ular bu qurollarni Ukrainaga berishlari mumkin bo‘ladi. NATO davlatlariga raketalar, havo hujumidan mudofaa tizimlari va artilleriya o‘qlarini sotish ko‘zda tutilgan. Bundan tashqari, AQSH Yevropaga qisqa masofali raketalar, gaubitsalar uchun o‘qlar va o‘rta masofali “havo-havo” toifasidagi raketalarni ham sotishi mumkin.
Tramp alyans bosh kotibi bilan uchrashuvda Yevropaga “milliardlab dollarlik harbiy texnika” yetkazib berilishini tilga olgan. Ammo deyarli hech qanday tafsilotlarni keltirmagan. U AQSH hamkor davlatlarga 17 ta Patriot zenit-raketa majmuasini yetkazib berishga tayyorlanayotganini bildirgan. Oryx loyihasining hisob-kitoblariga ko‘ra, keng ko‘lamli urush boshlanganidan beri ittifoqchilar Kiyevga atigi yettita shunday majmua yetkazib bergan.
Patriot tizimlarining ehtimoliy yetkazib berilishi haqida Tramp 14-iyul kuni jurnalistlar bilan uchrashuvda ham gapirgandi. O‘shanda Amerika prezidenti Ukraina havo hujumidan mudofaa tizimlariga “juda muhtoj” ekanini aytgan. Ushbu qaror urush boshlanganidan beri Ukrainaga faqat mudofaa qurollarini yetkazib berishni afzal bilgan Tramp siyosatidagi sezilarli burilish sifatida baholanmoqda.
Izoh (0)