Шимолий Атлантика альянсининг Россия ва Хитой билан уруши 2027 йилда бошланиши мумкин. Бу ҳақда НАТОнинг Европадаги бирлашган қуролли кучлари янги бош қўмондони, америкалик генерал-лейтенант Алексис Гринкевич ма`лум қилди, дея хабар бермоқда The Guardian.
“Барчамиз икки йилдан кейин келадиган 2027 йил ҳақида эшитганмиз. Бизнинг фикримизча, айнан ўша пайтда Си Цзиньпин ҳаракатга ўтиб, Путинга қўнғироқ қилиши мумкин”, деди генерал-лейтенант.
Гринкевичнинг айтишича, Пекин Тайван атрофидаги ҳудудда операция бошламасдан олдин ўз ҳаракатларини Москва билан олдиндан келишиб олиши эҳтимолдан холи эмас.
“Шу сабабли НАТО бундай воқеалар ривожига тайёр туриши ва барча зарур ресурсларга эга бўлиши лозим”, дейди Гринкевич.
Июль ойи бошида НАТО бош котиби Марк Рютте New York Times газетасига, агар Хитой раиси Си Цзиньпин Тайванга ҳужум қилишга қарор қилса, Россия ва Хитойнинг ҳарбий ҳамкорлиги режаси қандай бўлиши ҳақида ўз фикрларини билдирган эди. Унинг таъкидлашича, Хитой раҳбари биринчи бўлиб Россия президенти Владимир Путинга қўнғироқ қилиб, гўёки НАТОни чалғитишни сўрайди.
Бундан аввал НАТО бош котиби Марк Рютте агар Ҳиндистон, Хитой ва Бразилия Россия билан савдони давом эттирса, АҚШнинг иккиламчи санкциялари туфайли жиддий оқибатларга юзлашишидан огоҳлантирганди.
Изоҳ (0)