Kanada NATOning rejasidan bir necha yil oldin yalpi ichki mahsulotning 2 foizi miqdoridagi maqsadiga erishish uchun mudofaa xarajatlarini sezilarli darajada oshiradi. Bu haqda bosh vazir Mark Karniga tayanib BBC xabar berdi.
Karni 9-iyun kuni Toronto universitetida so‘zlagan nutqida bu harakat dushman hukumatlar, terroristik tuzilmalar va kiberjinoyatchilarning “ortib borayotgan” tahdidlarini bartaraf etish uchun zarurligini bildirgan.
Shuningdek, u o‘z mamlakati mudofaa uchun Qo‘shma Shtatlarga “juda bog‘lanib qolganini” tan olib, Vashington “kollektiv xavfsizlikka qo‘shayotgan hissasini kamaytirayotganini” qo‘shimcha qilgan.
NATO bosh kotibi Mark Ryutte a’zolarni shu oy oxirida bo‘lib o‘tadigan sammitda yalpi ichki mahsulotning 3,5 foizi miqdoridagi yangi xarajatlar bo‘yicha kelishuvga erishishga undamoqda.
Mark Karni o‘z nutqida dunyo Ikkinchi jahon urushi tugashidagi kabi “to‘xtash nuqtasida” ekanini aytgan. Unga ko‘ra, mamlakat “tajovuzkor Rossiya, Xitoy hamda Arktika xavfsizligiga tahdidlar” qarshisida choralar ko‘rishi kerak. Shuningdek, u Vashingtonni o‘z bozoriga kirishni qimmatroq qilish orqali “gegemonligini monetizatsiya qilishga” intilishda ayblagan.
Kanada 2024-yilda yalpi ichki mahsulotining 1,4 foizini mudofaaga sarflagan. 2025-yil boshida bo‘lib o‘tgan saylovoldi nutqida Karni 2030-yilga borib xarajatlarning 2 foizlik ko‘rsatkichiga erishishga va’da bergandi. Jastin Tryudo boshchiligidagi avvalgi hukumat esa buni 2032-yilgacha bajarmoqchi edi. Biroq 9-iyun kuni Karni xarajatlar maqsadiga 2026-yilning mart oyigacha erishilishini ma’lum qilgan.
Bosh vazirning aytishicha, Kanadaning texnikasi eskirib qolgan va harbiy tayyorgarlikka to‘sqinlik qilmoqda. 4 ta suv osti kemasidan faqat 1 tasi dengizga chiqishga yaroqli. Dengiz floti hamda quruqlikdagi transport vositalarining yarmidan kamrog‘i nisbatan yaxshi holatda ekani ta’kidlangan.
Yangi strategiya 4 ta ustunga ega bo‘ladi — askarlar va texnikaga ko‘proq sarmoya kiritish, harbiy salohiyatni kengaytirish, ichki mudofaa sanoatini mustahkamlash va Kanadaning mudofaa hamkorligini diversifikatsiya qilish.
Jurnalistlar bilan suhbatda Karni hukumatning yangi rejasi 2025-yilda naqd pulni 9,3 milliard Kanada dollariga (6,5 milliard dollar) oshirishni o‘z ichiga olishini bildirdi.
Ularning bir qismi kadrlar va texnikaga darhol sarflanishi aytilgan. Bu yangi suv osti kemalari, samolyotlar, kemalar, zirhli transport vositalari va artilleriya, shuningdek, Arktikadagi faollikni va yangi dronlar hamda sensorlarga sarmoya kiritishni o‘z ichiga olishi bildirilgan.
NATO a’zolari yillar davomida 2 foizlik maqsadni bajarishga va’da berishgan — hozirda bu minimal ko‘rsatkich sifatida qaraladi. Ammo Kanada uzoq vaqtdan beri ittifoqchilaridan ortda qolmoqda.
Izoh (0)