Davlat ko‘chmas mulk obyektlarini sotish tartibi to‘g‘risidagi nizom savdolarda sotilmagan munitsipal ko‘chmas mulk obyektlarini tasarruf etish tartibini belgilaydigan yangi bo‘lim bilan to‘ldirildi.
Unga ko‘ra, mahalliy ijro etuvchi hokimiyat organlariga tegishli bo‘lgan (Nukus, viloyat va tuman markazlari, shuningdek Toshkent tumanlari obyektlaridan tashqari) hududi 10 ming kvadrat metrdan oshmagan, baholangan qiymati BHMning 5 ming baravari miqdoridan oshmagan munitsipal ko‘chmas mulk obyektlari 6 oy davomida sotilmaganda tadbirkorlik subyektlariga to‘g‘ridan-to‘g‘ri ijaraga beriladi.
Bunda ijara muddati 10 yilni, ijara to‘lovi stavkasi esa eng kam miqdorni tashkil etadi. O‘z navbatida tadbirkorlik subyekti 2 yil davomida ishlab chiqarish, xizmat ko‘rsatish va servis sohalarida yangi loyihalarni ishga tushirishi va yangi ish o‘rinlarini yaratishi kerak.
Hujjat 1-iyuldan kuchga kirdi.
Prezidentning 2024-yil 20-dekabridagi farmonida 2025-yil 1-martdan hududi 10 ming metr kvadratdan, baholangan qiymati 5 ming BHMdan oshmagan hamda 6 oy davomida sotilmagan mahalliy davlat hokimiyati organlariga tegishli ko‘chmas mulk obyektlarini 2 yil ichida yangi loyihani ishga tushirish va ish o‘rinlari yaratish sharti bilan tadbirkorlarga to‘g‘ridan-to‘g‘ri 10 yil muddatga ijaraga berish belgilangandi.
Farmonda davlat mulki uchun 4 yil davomida uzluksiz ijara to‘lovlarini amalga oshirgan va ijara shartnomasi shartlarini bajargan tadbirkorga xususiylashtirish yoki baholangan qiymatda to‘g‘ridan-to‘g‘ri sotish mumkinligi qayd etilgandi. Ijaraga oluvchi shaxs ushbu mulkni to‘g‘ridan-to‘g‘ri sotib olish yuzasidan sotuvchiga ijara shartnomasini ilova qilgan holda ariza bilan murojaat qilishga haqli.
Izoh (0)