Qoraqalpog‘istonda tadbirkorlar imtiyozli kreditlar bilan qo‘llab-quvvatlanadi. Bu haqda “Qoraqalpog‘iston Respublikasida tadbirkorlarga qulay sharoitlar yaratishga oid qo‘shimcha chora-tadbirlar to‘g‘risida”gi prezident farmonida belgilandi.
Hujjatga ko‘ra, Qoraqalpog‘istondagi investitsiya loyihalarini moliyalashtirish maqsadida banklarga 100 million dollar ajratiladi.
Bunda:
- loyihalar banklar taʼsischiligidagi investitsiya kompaniyalari tomonidan amalga oshirilib, keyinchalik ular “tayyor loyiha” sifatida tadbirkorlarga sotiladi.
- banklar tomonidan investitsiya loyihalarini moliyalashtirish uchun kredit mablag‘lari 5 yillik imtiyozli davr bilan 10 yil muddatga Markaziy bankning asosiy stavkasidan yuqori bo‘lmagan miqdorda ajratiladi.
Tadbirkorlik faoliyatini qo‘llab-quvvatlash davlat jamg‘armasi tomonidan, istisno tariqasida, investitsiya kredit miqdorining 75 foizigacha biroq, 5 milliard so‘mdan ortiq bo‘lmagan miqdorda, kafillik shartnomasini bir tomonlama bekor qilmaslik sharti bilan kafillik taqdim etiladi.
Kichik hamda yoshlar sanoat va tadbirkorlik zonalarida investitsiya majburiyatlarini bajargan tadbirkorlarga yer uchastkalari, bino va inshootlar xususiylashtirib beriladi. Ommaviy savdolarda turgan davlat mulki obyektlari 3 oy muddatda sotilmagan taqdirda ularni elektron tanlov asosida eng yaxshi taklif bildirgan talabgorga investitsiya kiritish majburiyati bilan beriladi.
2023—2024-yillarda Nukus shahrida 1 million dollar, hududning qolgan tumanlarida 300 ming dollar miqdorida investitsiya kiritish majburiyati bilan loyiha tashabbuskorlariga Qoraqalpog‘iston Vazirlar Kengashi qarori asosida yer uchastkalarini to‘g‘ridan to‘g‘ri uzoq muddatli ijara huquqi bilan berish tizimi joriy qilinadi.
2024-yildan boshlab tijorat banklariga hudud uchun oilaviy tadbirkorlikni rivojlantirish dasturlari doirasida kamida 2 trillion so‘m kredit mablag‘lari ajratiladi.
Yoshlarning xorijiy davlatlarda taʼlim olishlari uchun 4 yillik imtiyozli davr bilan 10 yil muddatga Markaziy bankning asosiy stavkasidan yuqori bo‘lmagan miqdorda kredit mablag‘lari ajratiladi.
Izoh (0)