“Hududlarda yuqori iqtisodiy o‘sish va aholi bandligini ta’minlashning yangi tizimini yo‘lga qo‘yish hamda bu borada mahalliy hokimliklarning roli va mas’uliyatini oshirish chora-tadbirlari to‘g‘risida”gi prezident farmoni qabul qilindi.
Farmonga muvofiq, Qoraqalpog‘iston Respublikasi Vazirlar Kengashi raisi va viloyat hokimlariga quyidagi vakolatlar beriladi:
2025-yil 1-martdan hududi 10 ming metr kvadratdan, baholangan qiymati 5 ming BHMdan oshmagan hamda 6 oy davomida sotilmagan mahalliy davlat hokimiyati organlariga tegishli ko‘chmas mulk obyektlarini 2 yil ichida yangi loyihani ishga tushirish va ish o‘rinlari yaratish sharti bilan:
- tadbirkorlarga to‘g‘ridan-to‘g‘ri 10 yil muddatga ijaraga berish hamda davlat mulki uchun 4 yil davomida uzluksiz ijara to‘lovlarini amalga oshirgan va ijara shartnomasi shartlarini bajargan tadbirkorga xususiylashtirish yoki baholangan qiymatda to‘g‘ridan-to‘g‘ri sotish;
- xalqaro tan olingan xorijiy til va malaka sertifikatlarini olishga o‘qitadigan mahalliy hamda xorijiy mutaxassislar yoki tashkilotlarga dastlabki birinchi yili ijara to‘lovi undirmasdan 5 yil muddatga keyinchalik uning muddatini uzaytirish sharti bilan ijaraga berish.
Tuman (shahar)lar hokimliklariga quyidagi yo‘nalishlarda ma’muriy vakolatlar beriladi:
- davlat boshqaruvi organlari va tadbirkorlar o‘rtasida “doimiy aloqa” tizimini yaratish maqsadida tuman (shahar)larda Tadbirkorlar jamoatchilik kengashini tuzish;
- 2025-yil 1-yanvardan belgilangan vazirlik va idoralarning tuman (shahar) bo‘limlari rahbarlarini mas’ul vazirlik va idoralarning hududiy boshqarmalari bilan kelishilgan holda lavozimga tayinlash va lavozimidan ozod etish, shuningdek, tegishli mas’ullarga rag‘batlantirish yoki intizomiy javobgarlikka tortish choralarini ko‘rish;
- 2025-yil 1 yanvardan 2026-yil 1-yanvargacha belgilangan ro‘yxat bo‘yicha tuman (shahar)larda huquqiy eksperiment tariqasida tuman (shahar) hokimligi faoliyatini “Aholi va tadbirkorlar manfaatlariga xizmat qilish” yangicha yondashuvi asosida tashkil etish.
Hujjatga ko‘ra, rahbarlari tuman (shahar) hokimi tomonidan tayinlanadigan va lavozimidan ozod etiladigan bo‘limlar ro‘yxati quyidagicha:
- tuman (shahar) iqtisodiyot va moliya bo‘limi;
- tuman (shahar) kambag‘allikni qisqartirish va bandlikka ko‘maklashish bo‘limi;
- tuman (shahar) investitsiyalar, sanoat va savdo bo‘limi;
- tuman qishloq xo‘jaligi bo‘limi;
- tuman (shahar) qurilish va uy-joy kommunal xo‘jaligi bo‘limi;
- tuman (shahar) madaniyat bo‘limi;
- tuman (shahar) oila va xotin-qizlar bo‘limi;
- Yoshlar ishlari agentligi tuman (shahar) bo‘limi.
Hujjatda belgilanishicha, Iqtisodiyot va moliya vazirligi ikki oy muddatda Qoraqalpog‘iston Respublikasi Vazirlar Kengashi, viloyatlar va Toshkent shahri, tuman (shahar)lar hokimliklari xodimlarining mehnatiga haq to‘lash va ularniy moddiy rag‘batlantirish miqdorini oshirish bo‘yicha prezident farmoni loyihasini kiritishi lozim.
Bundan avval vazirlik, idoralar, hokimliklar ichki audit xizmati xodimlarining faoliyati samaradorligi baholanishi haqida xabar berilgan edi.
Izoh (0)