AQSHning Xitoy mahsulotlari importiga bojxona to‘lovlarini oshirishi aprel-iyun oylarida ikki tomonlama savdoning pasayishiga olib keldi. Bu haqda Xitoy Xalq Respublikasi Bosh bojxona boshqarmasi rais o‘rinbosari Van Linszyun ma’lum qildi.
“AQSHning o‘zaro tariflari ta’siri ostida Xitoy-Amerika savdosi birinchi chorakdagi yillik ko‘rsatkichlarning o‘sishidan ikkinchi chorakda pasayishga o‘tdi. Pasayish 20,8 foizni tashkil etdi”, dedi u matbuot anjumanida.
Uning ta’kidlashicha, Xitoy va Qo‘shma Shtatlarning Jeneva va Londondagi muzokaralarida erishilgan yutuqlar tufayli ikki davlat o‘rtasidagi tovar ayirboshlash bir qadar tiklangan.
“XXR va AQSH o‘rtasidagi savdo-iqtisodiy hamkorlikning mohiyati o‘zaro manfaatdorlikdan iborat. Bu nafaqat globallashuv davridagi ortga qaytmas tarixiy tendensiya va ishlab chiqarish zanjirlarining chuqur integratsiyalashuvi talabi, balki ikki mamlakat korxonalari o‘rtasidagi innovatsion hamkorlik va aholi farovonligini oshirishning amaliy zaruratidir”, deya ta’kidladi u.
Linszyunning aytishicha, XXR va AQSHning tegishli idoralari o‘zaro hamkorlikni davom ettirmoqda. U ikki davlat o‘rtasida savdo kelishuvlariga erishish oson kechmaganini, shantaj va bosim o‘tkazish siyosatining istiqboli yo‘qligini ta’kidlagan hamda muloqot eng to‘g‘ri yo‘l ekanligini bildirgan.
Trampning savdo urushi
2-aprel kuni AQSH prezidenti Donald Tramp barcha davlatlar uchun 10 foizlik asosiy tariflarni joriy qildi. Ammo bojlar har bir davlatning savdo balansiga qarab o‘zgardi. Xitoy bilan savdoda yirik defitsit mavjudligi bois AQSH bu mamlakat uchun tariflarni ancha yuqori darajaga ko‘tarib, 34 foizga yetkazdi.
Bunga javoban Pekin ham shuncha miqdorda Amerika tovarlariga bojlar soldi. Shundan so‘ng Tramp agar Pekin javob choralaridan voz kechmasa, bojlarni 50 foizgacha oshirish bilan tahdid qildi. Shu sababli bojlar 104 foizga oshdi. Natijada Xitoy Amerika mahsulotlari uchun bojlarni 84 foizga oshirishini e’lon qildi. Mazkur e’lon ortidan Tramp Pekin uchun tariflar 125 foizga chiqishini aytdi, keyinchalik buni 145 foizga oshirdi.
Xitoy mazkur tariflarga javoban stavkani 125 foizga ko‘tardi. Xitoy AQSHni “o‘zaro bojlar”ni bekor qilishga va o‘zining noto‘g‘ri amaliyotini tuzatishga chaqirdi. XXR raisi Si Szinpin hech bir davlat “boj urushi”dan yutmasligini qayd etdi. Shundan so‘ng ikkala davlat savdo muzokaralarini boshlagandi.
Izoh (0)