Toshkent shahrida DXX va Bojxona idoralari hamkorligida kuchli ta’sir qiluvchi dori vositalarining noqonuniy aylanmasiga qarshi kurashish doirasida bir kishi qo‘lga olindi.
Toshkent viloyatining Ohangaron shahrida istiqomat qiluvchi, 1992-yilda tug‘ilgan shaxsning Yangihayot tumanidagi ijaradagi yashash xonadoni xolislar ishtirokida ko‘zdan kechirilganda, kelgusida sotish maqsadida saqlab kelinayotgan 16 249 dona “Zardeks” kuchli ta’sir qiluvchi dori vositalari borligi aniqlanib, ashyoviy dalil sifatida olib qo‘yilgan.
Ma’lum bo‘lishicha, u muqaddam Telegram orqali savdo qiluvchi shaxs tomonidan Sergeli tumani hududidagi xufiya joyga qoldirib ketilgan ushbu dori vositalarini olib, kelgusida mijozlarga sotganidan so‘ng, narkosavdogarga 16 ming AQSH dollari berishi kerak bo‘lgan.
“Zardeks” dori vositalari tarkibida pregabalin moddasi mavjud bo‘lib, Vazirlar Mahkamasining 2019-yildagi qaroriga muvofiq, u kuchli ta’sir qiluvchi moddalar turkumiga kiradi.
Hozirda dorifurush fuqaroga nisbatan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda egallash) 5-qismi bilan jinoyat ishi qo‘zg‘atilib, qamoq ehtiyot chorasi qo‘llandi.
Qonunchilikka ko‘ra, ko‘p miqdorda kuchli ta’sir qiluvchi yoki zaharli moddalarni qonunga xilof ravishda egallash 10 yildan 20 yilgacha ozodlikdan mahrum qilish bilan jazolanadi. Ayni paytda tergov harakati olib borilmoqda.
2025-yilning birinchi yarmida bojxonada 1247 kilo giyohvandlik vositalari, 156 kilo psixotrop va kuchli ta’sir etuvchi moddalar to‘xtatib qolingan.
Izoh (0)