Donald Tramp ma’muriyati tashqi siyosatga yondashuvni o‘zgartirish maqsadi bilan mazkur korpusda mehnat qilayotgan 1 107 nafar mahalliy va 246 nafar xorijiy xizmat xodimlarini ishdan bo‘shatmoqda. Rasmiylar bu qarorni “ichki operatsiyalarni soddalashtirish va diplomatik ustuvorliklarga e’tiborni kuchaytirish” niyati bilan izohlagan.
Davlat departamentining xodimlari soni umumiy hisobda 18 ming nafarni tashkil etadi. Hozircha ularning 3 mingga yaqinini qisqartirish rejalashtirilgan. Mazkur raqamlar o‘z ixtiyori bilan ishdan bo‘shagan xodimlarni ham o‘z ichiga oladi.
Rasmiylarga ko‘ra, ishdan bo‘shatish tashabbusi asosiy bo‘lmagan, bir-birini takrorlovchi va samarasiz bo‘limlarga taalluqli bo‘lib, “tejamkorlikni oshirish” maqsad qilingan.
Prezident Tramp bu islohotni o‘zining “Avvalo Amerika” siyosati bilan izohlagan bo‘lsa-da, tanqidchilar mazkur qadam AQSHning Xitoy va Rossiya kabi raqiblarga qarshi diplomatik salohiyatiga jiddiy putur yetkazishini ta’kidlamoqda.
“Tramp va davlat kotibi Marko Rubio yana Amerika xavfsizligini zaiflashtirmoqda”, dedi demokrat senator Tim Keyn.
Oq uyning davlat apparatini toraytirish tashabbusi hukumat idoralari va boshqa organlarning keng tuzilmalarini qamrab oladi.
Izoh (0)