Kamerunning 92 yoshli prezidenti Paul Biya oktyabrda bo‘lib o‘tadigan prezidentlik saylovlarida sakkizinchi marotaba o‘z nomzodini qo‘yishini ma’lum qildi. Bu haqda AP News xabar berdi.
Mamlakatda ko‘pchilik Paul Biyaning saylovda qatnashmasligini taxmin qilayotgandi. U Afrika qit’asida eng uzoq muddat prezidentlik qilayotgan ikkinchi rahbar sanaladi. Bu borada u Ekvatorial Gvineya prezidenti Teodoro Obiangdan keyingi o‘rinda turadi.
Prezident so‘nggi paytlarda tez-tez kasal bo‘lib, chet elga davolanish uchun borib turishi haqida ma’lumotlar bor. Shu bilan birga, 2024-yili uning o‘lgani haqida mish-mishlar tarqalgandi. Mamlakat hukumati esa bu ma’lumotni rad etgan.
Kamerun 1960-yilda Fransiyadan mustaqillikka erishgan. Shundan so‘ng, Biya mamlakatning ikkinchi prezidenti bo‘lib, 1982-yilda hokimiyat tepasiga kelgan. U oxirgi marta 2018-yilgi prezidentlik saylovida 70 foizdan ortiq ovoz bilan g‘alaba qozongandi.
“Sizga xizmat qilishda qat’iyat bilan davom etaman. Bunga ishonchingiz komil bo‘lsin”, degan Biya ijtimoiy tarmoqlardan birida xalqiga yuzlanib.
Huquqshunos Nkongo Feliks Paul Biyaning qarorini quyidagicha izohladi:
“Biyaning prezidentlikka yana o‘z nomzodini qo‘yishi Kamerunda siyosiy o‘zgarishlarga yo‘l yo‘qligidan dalolat beradi. 40 yildan ortiq hukmronlikdan keyin mamlakatga yangilanish kerak — takrorlanish emas. Kamerunliklar demokratik o‘zgarishlar va mas’uliyatli hukmronlikka loyiq”.
Ma’lumot uchun, Kamerun nafaqat Afrika, balki dunyoning eng qashshoq davlatlaridan biri. Mamlakatda YIM ko‘rsatkichi aholi jon boshiga 2 000 AQSH dollaridan kam.
Izoh (0)