AQSH prezidenti Donald Tramp kutilmaganda Senatning Rossiyaga qarshi yangi sanksiyalar to‘g‘risidagi taklifini qo‘llab-quvvatladi. Gap Rossiyadan neft sotib olayotgan davlatlardan keladigan barcha tovarlarga 500 foizlik boj solish haqida bormoqda. Agar bu sanksiyalar qabul qilinsa, ular Rossiya neftiga qarshi global embargo darajasiga chiqishi mumkin. Bu haqda The Times yozmoqda.
Nashrining qayd etishicha, Tramp ilgari Rossiyaga nisbatan yangi iqtisodiy sanksiyalar joriy etishdan tiyilgan, chunki u Vladimir Putin bilan muzokaralar olib borishga umid qilgan edi. Ammo bu hafta Oq uy rahbarining ritorikasi keskin o‘zgardi. Donald Tramp amerikalik hamkasbidan norozi ekanini ochiqcha aytgan.
Ayni vaqtda, AQSH Senati senatorlar Lindsi Grem va Richard Blumental tomonidan taqdim etilgan ikki partiyaviy qonun loyihasi muhokama qilinmoqda. Unga binoan Rossiyadan energiya resurslari sotib olayotgan mamlakatlardan keladigan barcha tovarlarga 500 foiz boj solinishi belgilangan. Tramp avvalroq bu qonunni “haddan tashqari qatʼiy” deb atagan bo‘lsa-da, hozir uni diqqat bilan ko‘rib chiqayotganini taʼkidlagan.
Mazkur sanksiyalar Rossiyaning o‘zidan ko‘ra, undan energiya resurslari sotib olayotgan asosiy xaridorlariga qaratilgan ikkilamchi sanksiyalar sifatida ko‘rilmoqda. Jumladan, Xitoy, Hindiston va Turkiya jiddiy oqibatlarga duch kelishi mumkin. Mazkur chora Rossiya neftiga qo‘yilgan sanksiyalarni aylanib o‘tishga xizmat qilayotgan tankerlardan iborat “soya floti”ni ham falaj qilishi mumkin.
Tashqi siyosat tadqiqot instituti eksperti Maksimilian Hess buni quyidagicha izohladi:
“Rossiya neftini sotib olayotgan mamlakatlarga 500 foiz boj solinishi amalda rus neftiga global embargo qo‘yilishini anglatadi”.
Ammo u Tramp bunday qadamni tashlashiga shubha bilan qaraydi. Boisi bunday bo‘lgan taqdirda neft narxi 100 dollargacha ko‘tarilishi mumkin. Hessga ko‘ra, Tramp faqat Rossiyadan kelayotgan tahdid iqtisodiy yo‘qotishlardan ko‘proq xavf soladi, deb qaror qilsa, bu qonunni qo‘llab-quvvatlaydi.
Rossiyaga nisbatan tanqidlarini kuchaytirgan Tramp 14-iyul kuni bu bo‘yicha muhim bayonot e’lon qilmoqchi. U senatorlar tomonidan taklif etilayotgan qonun loyihasiga taalluqli bo‘lishi mumkin.
Respublikachi senator Lindsi Grem va demokrat Richard Blumental mazkur qonun loyihasini aprel oxirida taqdim etishgan edi. Unda Rossiyadan neft sotib olayotgan mamlakatlarga 500 foizlik bojxona to‘lovlari joriy etilishi ko‘zda tutilgan.
OAVga ko‘ra, Tramp ushbu qonunni imzolashga tayyor. Ammo u sanksiyalarni joriy etish va bekor qilish jarayonini shaxsan o‘zi nazorat qilishni istamoqda.
Izoh (0)