Ukraina prezidenti Vladimir Zelenskiy Rossiya armiyasi kuniga mingta dron uchirishga tayyorlanayotganini aytdi. Bu haqda u Rimdagi Ukrainani tiklash bo‘yicha konferensiyada ma’lum qildi.
Zelenskiyning aytishicha, Rossiyaning asosiy maqsadi — uzoq davom etuvchi havo trevogalari orqali Ukraina jamiyatida vahima va beqarorlik uyg‘otishdir. Biroq Ukraina bu tahdidlarga qarshi samarali vositalarga ega va hujumlarga munosib javob qaytaradi.
Ularning (rossiyaliklarning) ikkinchi rejasi kuniga 700 dan 1000 tagacha dron uchirish. Biz ularning barchasini urib tushiramiz, dedi Zelenskiy.
U Shahed dronlariga qarshi kurashishda samaradorligi isbotlangan texnologiyalar mavjudligini aytdi. Ukraina ham bunday dronlarni ommaviy ishlab chiqarishga qodirligi, ammo buning uchun yetarli moliyalashtirish zarurligini ta’kidladi.
Biz mamlakat sifatida yechim topdik. Olimlar, muhandislar yechim topdi. Bu hal qiluvchi nuqta. Bizga mablag‘ kerak va ularni urib tushira olamiz, deb ta’kidladi siyosatchi.
Ukraina armiyasi bosh qo‘mondoni Aleksandr Sirskiy Shahed’larni tutib oluvchi dronlarning samaradorligi 70 foizni tashkil etishini aytgan. Bu ko‘rsatkich mobil o‘t ochish guruhlariga nisbatan deyarli ikki baravar yuqori. Shu bilan birga, mobil guruhlar hali ham dolzarbligini yo‘qotmagan, dronlarni tutib oluvchilar esa radar tizimlariga (RLS) muhtoj.
Ma’lumot o‘rnida, Rossiya 9-iyulga o‘tar kechasi Ukrainaga 741 ta dron va raketa bilan hujum qildi. Bu urush boshlanganidan beri uchirilgan rekord miqdordagi dron hisoblanadi. Qurbonlar va jarohatlanganlar haqida ma’lumot berilmagan. Uchirilgan texnikalarning 718 tasi Ukraina havo hujumidan mudofaa kuchlari tomonidan zararsizlantirilgan. 4 ta hududga zarba berilgani va 14 ta joyda dronlarning qoldiqlari qulagani ma’lum.
Izoh (0)