Olimlar Australian Square Kilometre Array Pathfinder radioteleskopi yordamida koinotda har 44 daqiqa 12 soniyada Yer tomon impuls yuboradigan g‘alati obyektni aniqlashdi. Ushbu mavzudagi tadqiqot Nature jurnalida e’lon qilindi.
Mutaxassislarning tushuntirishicha, oddiy radioteleskoplar kosmosdagi ma’lum bir sektorni o‘rganadi. Ular qo‘shimcha qilishicha, avstraliyalik teleskop boshqacha tamoyilda ishlaydi — u uzoq masofalarni tezda skanerlaydi.
Olimlarning ta’kidlashicha, Yer fani uchun “pulsarlar” deb ataladigan, belgilangan bir davriylik va juda katta tezlik bilan takrorlanadigan radioimpulslar uzoq vaqtdan beri ma’lum.
Bundan tashqari, uzoq davrli pulsarlar — impulslarni sekundiga ko‘p marta emas, balki soatiga bir marta uzatadigan obyektlar ham mavjud. Aynan shu turdagi pulsar deb dastlab 14,67 ming yorug‘lik yili masofasida, galaktikaning eng chekkasida joylashgan yangi obyekt hisoblangan.
Kertin universiteti xodimi Van Szi Ten boshchiligidagi astronomlar guruhi ASKAP J1832-0911 (astronomlar obyektga shunday nom berishgan) nomli obyektga rentgen teleskopini yo‘naltirdi.
Tadqiqot davomida ma’lum bo‘lishicha, obyekt nafaqat radioimpulslarni, balki xuddi shu tezlikda pulsatsiyalanuvchi rentgen nurlanishini ham chiqaradi.
Ma’lumotlarga ko‘ra, manbaning yorqinligi yuqori bo‘lgan davrlari (masalan, 2023-yil oxiri - 2024-yil boshi) va juda zaif pulsatsiyalangan vaqtlari bo‘lgan.
Olimlar obyekt yakka magnetar, ya’ni magnit maydoni o‘ta kuchli bo‘lgan neytron yulduz bo‘lishi mumkinligini taxmin qilishmoqda. Shu bilan birga, ular hali ko‘plab jumboqlar mavjudligini va ularni yanada chuqurroq o‘rganish zarurligini tan olishdi.
Ilgari astronomlar Quyosh tizimining tashqi qismida, xususan Neptun ortida, xususiyatlari bo‘yicha mitti sayyoraga o‘xshash jismni aniqlagani xabar qilingandi.
Izoh (0)