Turkmenistan Airlines 1-iyundan boshlab Moskvaga muntazam parvozlarni yana to‘xtatadi. Bu haqda kompaniya matbuot xizmati xabar berdi.
Ashxobod—Moskva—Ashxobod yo‘nalishi bo‘yicha aviachiptalarga ega yo‘lovchilar avtomatik ravishda Ashxobod—Qozon yo‘nalishi bo‘yicha reyslarga o‘tkaziladi. Bundan tashqari, 2-iyundan 14-iyungacha yo‘lovchilar uchun Qozon aeroportidan Domodedovo aeroportiga bepul yer usti transferi tashkil etiladi.
Bu Turkmenistan Airlines’ning uchinchi marta Rossiya poytaxtiga parvozlarni bekor qilishi. Dekabr oyida Azerbaijan Airlines samolyoti ekipaji dronlar hujumi sababli parvozni Oqtovga (Qozog‘istonga) yo‘naltirganidan so‘ng halokatga uchragach, Moskvaga parvozlar to‘xtatilgandi. Mazkur parvozlar mart oyida qayta tiklangandi.
2023-yil avgust oyida ham Rossiya poytaxtiga dronlar hujumi tufayli Turkmaniston xavfsizlik nuqtayi nazaridan parvozlarni bekor qilgandi. Moskvaga parvozlar besh oydan so‘ng qayta tiklangan.
Izoh (0)