Yerga hafta oxirida ko‘p qavatli bino o‘lchamidagi asteroid yaqinlashmoqda

2023 DZ2 nomil asteroid 25—26 mart kunlari sayyoramizga 175 ming kilometr masofagacha yaqinlashadi, deb xabar bermoqda Kubnews.

Kosmik jismning o‘lchami taxminan 60 metrni tashkil qiladi.

“ISON-Kitab rasadxonasida 2023 DZ2 asteroidi Yerga yaqinlashayotganini kuzatmoqdamiz, bu obyekt 2020-yil iyun oyidan buyon Yer orbitasiga uchib kirganlar orasida eng yirigi bo‘ladi”, — deyiladi Rossiyaning M.V Keldish RAN nomidagi amaliy matematika instituti “Ilmiy va amaliy muammolar uchun xalqaro teleskoplar tarmog‘i” Kollektiv foydalanish markazi telegram-kanalida.

Ta’kidlanishicha, asteroidni professional bo‘lmagan teleskoplar yordamida ham ko‘rish mumkin. Astronomlar jism juda yorqin bo‘lishiga ishonmoqda.

Avvalroq Amerika aerokosmik agentligi (NASA) 23 yildan keyin, ya’ni 2046-yil 14-fevral kuni Yerga 2023 DW nomli asteroid tushishi mumkinligini ma’lum qilgandi. 2023 DW asteroidning diametri taxminan 49,29 metrni tashkil etadi va hozir Yerdan taxminan 0,12 astronomik birlik masofasida joylashgan. 2023 DW Turin shkalasi bo‘yicha 1 ballga ega bo‘lgan “xavfli ro‘yxatdagi” yagona asteroiddir.