Meksikaning Ensenada shahrida yashovchilar 6-fevral kuni osmonda ko‘ringan noma’lum jismni tasvirga oldi. Ular buni meteorit deb o‘ylashgan, ammo obyekt aslida 2017-yilda EchoStar23 geostatsionar aloqa sun’iy yo‘ldoshi bilan koinotga uchirilgan SpaceX Falcon 9 raketasining ikkinchi bo‘lagi ekani ma’lum bo‘ldi. Hozirda u atmosferada butunlay parchalanib ketgan.
SpaceX kompaniyasi so‘nggi marta 3-fevral kuni 49 ta Starlink internet sun’iy yo‘ldoshlarini orbitaga chiqardi. Keyinroq kompaniyaning xabar berishicha, geomagnit bo‘roni tufayli 49 ta sun’iy yo‘ldoshdan taxminan 40 tasi yo‘qolgan.
Qayd etilishicha, quyi balandliklarda qarshilikning kuchayishi natijasida 40 ga yaqin sun’iy yo‘ldosh orbitadan chiqib ketgan va Yer atmosferasiga qaytgan. Bo‘ron tufayli havo qarshiligi avvalgiga qaraganda 50 foizga ortgan. Mutaxassislar qarshilikni kamaytirish uchun mini-sun’iy yo‘ldoshlarni xavfsiz rejimga o‘tkazishga qaror qilgan, bunda ular orbitada yon tomonga harakatlanadi, ammo ushbu choralar yordam bermagan.
Kompaniya ma’lumotlariga ko‘ra, orbitadan chiqib ketgan apparatlar boshqa sun’iy yo‘ldoshlar uchun xavf tug‘dirmaydi, ular Yer atmosferasiga kirganda yonib ketishga mo‘ljallangan.
SpaceX orbital guruhi har birining og‘irligi 290 kg bo‘lgan ikki mingdan ortiq kosmik apparatdan iborat. Hozirda kompaniya dunyodagi eng yirik sun’iy yo‘ldosh operatori hisoblanadi.
Kelajakda SpaceX Yer aholisini dunyoning istalgan nuqtasida internet bilan ta’minlaydigan to‘liq miqyosli tarmoqni yaratish uchun ushbu turdagi 12 000 ta kosmik apparatni (keyinchalik 30 000 ta) orbital guruhga joylashtirishni rejalashtirmoqda. Loyihaga tikilgan sarmoyaning umumiy hajmi 10 milliard dollarga baholanmoqda.
Izoh (0)