Angliyaning “Tottenhem” klubi daniyalik mutaxassis Tomas Frank jamoaning yangi bosh murabbiyi etib tayinlanganini e’lon qildi. 51 yoshli murabbiy bilan 2028-yilga qadar mo‘ljallangan shartnoma imzolandi.
London klubi rasmiy bayonotida quyidagilarni ta’kidladi:
Tomas Frank futbol olamidagi eng ilg‘or va innovatsion bosh murabbiylardan biri hisoblanadi. U futbolchilar va jamoani rivojlantirish borasida katta tajribaga ega. Yangi mavsumni sabrsizlik bilan kutyapmiz.
Avvalroq ommaviy axborot vositalarida “Brentford” klubi Tomas Frankni “Tottenhem”ga taxminan 12 million yevro evaziga qo‘yib yuborishga rozi bo‘lgani haqida xabarlar tarqalgan edi. U Yevropa Ligasidagi g‘alabasi bilan klubning uzoq yillik sovrinsiz davriga barham bergan Anje Postekoglu o‘rnini egallaydi.
Frank 2018-yil oktyabridan buyon “Brentford” bosh murabbiyi lavozimida faoliyat yuritib kelayotgan edi. Uning qo‘l ostida “asalarilar” so‘nggi yillarda Angliya Premyer Ligasida yaxshi o‘yinlar namoyish etib kelayotgan edi va bir necha yosh futbolchilarni yuqori darajaga olib chiqishga muvaffaq bo‘ldi.
2024/25-yilgi mavsum yakunlariga ko‘ra, “Tottenxem” APLda 17-o‘rinni egalladi, “Brentford” esa 10-pog‘onada mavsumni yakunladi.
Izoh (0)