Ushbu mavsumda Angliya Premyer Ligasida chempionlik masalasida intriga yo‘qoldi. Ko‘plab mutaxassislar mavsum o‘rtasida “Liverpul” chempionlikni qo‘lga kiritishini taxmin qilgan bo‘lsa-da, ular aprel oyida buni rasmiylashtirdi. Ammo chempionatda bitta intriga bor — Chempionlar Ligasi yo‘llanmasi uchun kurash. Musobaqa yakunlanishiga 2 tur qoldi, ammo keyingi mavsum Angliyadan qaysi jamoalar klublar o‘rtasidagi eng nufuzli turnirda qatnashishiga aniqlik kiritilmagan.
Bu yil Angliya Premyer Ligasidan birdaniga 5 ta klub mazkur chempionatga yo‘l oladi. Shuningdek, Yevropa Ligasi g‘olibi — “Manchester Yunayted” yoki “Tottenhem” ham qo‘shimcha kvota sifatida Chempionlar Ligasida qatnashadi. Hozircha unda qatnashadigan bir jamoa nomi ma’lum — “Liverpul”. Qolgan 4 ta yo‘llanma uchun 6 ta klub bahslarga kirishgan. Muhim eslatma, agar jamoalarning ochkolari teng bo‘lib qolgan taqdirda asosiy ko‘rsatkich sifatida musobaqadagi to‘plar farqi hisobga olinadi.
“Arsenal” – 99,9%
Mikel Arteta jamoasi uchun Chempionlar Ligasi yo‘llanmasi deyarli kafolatlangan. Oxirgi ikki turda kimga qarshi o‘ynashidan qat’i nazar, “kanonirlar” musobaqa chiptasini qo‘ldan chiqarishi imkonsiz. Hatto qolgan ikkala o‘yinda ham mag‘lubiyatga uchrasa-da, kuchli beshlikdan tushib ketish ehtimoli past.
Bunga asosiy sabab — “Nottingem” va “Chelsi” o‘zaro to‘qnash kelishi, ya’ni ushbu jamoalar o‘rtasidagi bahsda qaysidar jamoa yoki ikkalasi ham ochko yo‘qotadi. Agar navbatdagi turlarda “Nottingem” g‘alaba qozonib, “Arsenal” yutqazsa ham, to‘plar farqi “kanonirlar” foydasiga qoladi. Shu bois London grandining keyingi mavsum YCHLda qatnashishi deyarli aniq, lekin nazariy jihatdan qolganlarda imkoniyat bor. Keyingi turda “Arsenal” buni 100 foizga aniq qilishi kutilmoqda.
“Nyukasl” – 95,5%
Eddi Hau shogirdlari mavsum oxiriga kelib yaxshi sport formasiga kirib oldi. Joelintonning jarohatiga qaramay, klub kuchli o‘yin namoyish qilmoqda. Oldinda “qarg‘alar”ni “Arsenal”ga qarshi safardagi o‘yin va “Everton”ga qarshi uy uchrashuvi kutib turibdi.
“Nyukasl” Yevropa Chempionlar Ligasiga chiqish imkoniyati yaxshi. Agar ular navbatdagi bahslarda bitta g‘alabani qo‘lga kiritsa, buni rasmiylashtiradi.
Ba’zi ssenariylarda hattoki bitta durang ham kifoya qiladi. Bu “Chelsi” va “Nottingem” o‘rtasidagi bahs hamda “Aston Villa”ning to‘plar farqidagi yomon natijasi evaziga qo‘lga kiritilishi mumkin. Agar ular ikki bahsda ham mag‘lubiyatga uchrasa-da, nazariy jihatdan imkoniyat saqlanib qoladi. Lekin buning ehtimoli juda past.
“Manchester Siti” – 92,7%
Pep Gvardiola jamoasi mavsum o‘rtalarida inqirozga uchragan edi. Biroq keyinchalik holatni barqarorlashtirishdi va ayni payda Chempionlar Ligasi yo‘llanmasini qo‘lga kiritish uchun juda yaqin turibdi.
“Shaharliklar”ning hisobida “Nyukasl”dan 1 ta kam ochko bor. Lekin bu jamoalardagi holat deyarli bir xil — qolgan 2 bahsda 1 ta g‘alaba yetarli. Uchrashuvlar esa unchalik kuchli bo‘lmagan jamoalarga qarshi: “Bornmut” bilan uyda va “Fulhem”ga qarshi safarda. Agar “Siti” ikkala bahsda ham imkoniyatni boy bersa, YCHL yo‘li deyarli yopiladi. Lekin mavsum so‘nggi ekanligi hamda raqib jamoalar o‘rtamiyona ekanligi hisobiga “shaharliklar”ning holatini yomon deb bo‘lmaydi.
“Chelsi” – 56,3%
Enso Mareska boshchiligidagi “Chelsi” ayni payt turnir jadvalida 5-o‘rinni egallab turibdi. Bu holatda Chempionlar Ligasi yo‘llanmasini qo‘lga kiritish uchun so‘nggi ikki o‘yinda faqat g‘alaba zarur. Agar “Chelsi” 6 ochko to‘plasa, deyarli kafolatlangan holda musobaqa chiptasini qo‘lga kiritadi.
Nazariy jihatdan “Aston Villa” ham 6 ochko to‘plab, to‘plar farqi evaziga London klubini quvib o‘tishi mumkin. Ammo hozir “Chelsi” raqibidan 12 ta gol farqi bilan oldinda. Uning uchun “Villa” keyingi ikki uchrashuvda kamida 15 marta gol urib, o‘z darvozasidan gol o‘tkazib yubormaslik talab qilinadi. Ammo bunday ssenariyni amalga oshish foizi 0 ga teng.
Shu bois, “aristokratlar” qolgan ikki bellashuvda o‘zi uchun kerakli ochkolarni qo‘lga kiritsa kifoya qiladi. Londonliklar so‘nggi turlarda “Manchester Yunayted” (uyda) va “Nottingem Forest” (safarda)ga qarshi maydonga tushishadi.
“Aston Villa” – 37,9%
Unai Emeri jamoasi ushbu mavsum Yevropa Chempionlar Ligasi darajasida o‘yin ko‘rsata olshini isbotladi. Ular turnirda ajoyib qatnashib, chorak finalgacha yetib keldi. Biroq bu mavsum musobaqa uchun yo‘llanma olish oson kechmayapti. “Aston Villa”ni oldinda “Tottenhem” (uyda) va “Manchester Yunayted” (safarda) bilan o‘yinlar kutmoqda.
Raqiblar hozirda yaxshi formada emas, biroq “Villa”ning YCHLga chiqishi uchun faqat o‘z o‘yinlarigi g‘alaba yetarli emas. Yuqorida aytilganidek, ularda to‘plar farqi juda yomon. Agar turnirga borishni istasa, juda yirik hisoblarda g‘alaba qozonishi talab etiladi. Lekin bu juda qiyin. Masalan, “Chelsi” 8:0 yutqazib, “Villa” 8:0 yutsa ham, bu ssenariy amalda ro‘y berishi qiyin.
Eng real variant — raqiblar, xususan “Siti” yoki “Chelsi” ochko yo‘qotishi va “Villa” bundan foydalanishi.
“Nottingem Forest” – 17,8%
“Nottingem” uzoq vaqt kuchli uchlikda yurdi. Ammo so‘nggi haftalarda natijalar keskin pasaydi: 6 turda atigi 1 ta g‘alaba. Endi esa ular Chempionlar Ligasi uchun raqiblarining omadsizlikka uchrashini kutishi kerak.
Jamoa uchun yaxshi tomoni — “Chelsi” bilan bevosita to‘qnashuv mavjudligi. Ya’ni bu o‘yinda g‘alaba qozonish orqali bevosita raqibdan ochko tortib olish mumkin.
Biroq bunga erishish uchun avval “Vest Hem”ni safarda mag‘lub etish talab etiladi. So‘ng “Chelsi” ustidan g‘alaba va raqiblar — “Villa” yoki “Chelsi”ning boshqa o‘yinlarda ham ochko yo‘qotishini kutishi talab etiladi.
Xulosa o‘rnida shuni aytish mumkinki, Angliya Premyer Ligasida chempion nomi oldinroq ma’lum bo‘lgan bo‘lsa-da, Chempionlar Ligasi yo‘llanmasi uchun kurash oxirgi turlargacha saqlanib qoldi. “Liverpul” allaqachon YCHL yo‘llanmasini qo‘lga kiritgan. Endilikda qolgan to‘rtta o‘rin uchun “Arsenal”, “Nyukasl”, “Manchester Siti”, “Chelsi”, “Aston Villa” va “Nottingem Forest” klublari o‘z imkoniyatlarini ishga solmoqda.
Eng qulay holat “Arsenal” va “Nyukasl”da – ular deyarli Chempionlar Ligasi ishtirokchisiga aylanib bo‘lgan. “Manchester Siti” ham yakuniy bosqichda kerakli ochkolarni qo‘lga kiritsa, asosiy vazifani uddalaydi. “Chelsi” esa o‘z qo‘lida bo‘lgan imkoniyatni boy bermaslikka harakat qiladi – ayniqsa, “Nottingem” bilan hal qiluvchi o‘yin hal qiluvchi rol o‘ynashi mumkin. “Aston Villa” va “Nottingem Forest” esa raqiblarning xatolariga umid qilmoqda.
Shunday qilib, yakuniy ikki tur futbol ishqibozlari uchun yuqori darajadagi intriga va kutilmagan burilishlarga boy bo‘lishi aniq. Qaysi jamoa musobaqa yo‘llanmasini qo‘lga kiritadi — barchasi maydondagi o‘yinlarda hal bo‘ladi.
Izoh (0)