Futbol bo‘yicha Angliya chempionati 28-turida “Manchester Siti” safarda “Nottingem Forest”ga 0:1 hisobida yutqazdi.
So‘nggi 7 yilda 6 marta Angliya chempioni bo‘lgan “shaharliklar” uchun bu mavsum omadsiz o‘tmoqda. “Siti” kecha, 8-mart kuni joriy mavsum ichki chempionat doirasidagi 9-mag‘lubiyatini qabul qildi. Shu tariqa, Xosep Gvardiola o‘zining shaxsiy antirekordini takrorladi. Xuddi shunday ko‘rsatkich klubda 2019—20-yilgi mavsumda kuzatilgan bo‘lib, o‘shanda ular ikkinchi o‘rinni egallab, chempion “Liverpul”dan 18 ochkoga ortda qolgan edi. Gvardiola “Manchester Siti” boshqaruviga kelgach, faqat ikki marta chempion bo‘la olmagan: 2016—17-yillardagi debyut mavsumida hamda 2019—20-yilgi mavsumda ular bosh sovringa ega chiqmagan.
Shuningdek, kechagi bahs ushbu mavsum barcha musobaqalar doirasidagi manchesterliklarning 15-mag‘lubiyat sifatida qayd etildi va bu borada ham Gvardiola shaxsiy antirekordini yangiladi. Bungacha ispaniyalik mutaxassis boshqaruvidagi jamoa hech qachon bir mavsumda 15 marta imkoniyatni boy bermagan edi.
Ushbu mavsumda “shaharliklar” quyidagi jamoalarga mag‘lub bo‘ldi:
- “Tottenhem” (1:2, 0:4)
- “Bornmut” (1:2)
- “Sporting” (1:4)
- “Brayton” (1:2)
- “Liverpul” (0:2, 0:2)
- “Yuventus” (0:2)
- “Manchester Yunayted” (1:2)
- “Aston Villa” (1:2)
- “PSJ” (2:4)
- “Arsenal” (1:5)
- “Real Madrid” (2:3, 1:3)
Ma’lumot uchun, joriy mavsum “Siti” 28-turdan keyin 47 ochko bilan APL turnir jadvalida 4-o‘rinda bormoqda.
Izoh (0)