Braziliya terma jamoasi yangi bosh murabbiyi Karlo Anchelotti 2026-yilgi Jahon chempionati saralash bosqichidagi bo‘lajak o‘yinlar uchun qaydnomani e’lon qildi. Shundan keyin ko‘pchilikda Neymar nega tarkibga kiritilmagani borasida savollar paydo bo‘ldi.
Italiyalik mutaxassis “Santos” hujumchisi nega tarkibga kiritilmaganini tushuntirib o‘tdi:
Men yaxshi sport formasidagi futbolchilarni tanlashga harakat qildim. Neymar yaqinda jarohat oldi. Hamma biladi, u jamoaning eng muhim futbolchisi va shundayligicha qoladi.
Hozir bizda jarohat olganlar yetarlicha topiladi va ular orasida Neymar ham borligi achinarli holat. U haqida shuni aytishim mumkinki, biz Neymarga tayanamiz. Braziliya unga ishonadi. Jarohatdan tiklangach, jamoaga qaytadi va Jahon chempionati uchun tayyorgarlik ko‘rishni boshlaydi. Bugun ertalab Neymar bilan gaplashdim va qarorimni aytdim. U bundan xafa emasligini bildirdi, dedi Anchelotti Marca nashriga.
6-iyun, juma kuni Braziliya safarda Ekvadorga qarshi maydonga tushadi. 11-iyun, chorshanba kuni esa o‘z maydonida Paragvayni qabul qiladi. Karlo Anchelotti ushbu muhim bahs uchun quyidagi futbolchilarni jalb qildi.
Braziliya terma jamoasidan chaqiruv olgan futbolchilar ro‘yxati:
Darvozabonlar: Alisson (“Liverpul”, Angliya), Bento Krepski (“An-Nassr”, Saudiya Arabistoni), Ugo Souza (“Korintians”);
Himoyachilar: Aleks Sandro (“Flamengo”), Alekssandro (“Lill”, Fransiya), Lukas Beraldo (“PSJ”, Fransiya), Karlos Augusto (“Inter”, Italiya), Danilo (“Flamengo”), Leo Ortis (“Flamengo”), Markinyos (“PSJ”, Fransiya), Vanderson (“Monako”, Fransiya), Uesli (“Flamengo”).
Yarim himoyachilar: Andreas Pereyra (“Fulhem”, Angliya). Andrey Santos (“Strasburg”, Fransiya), Bruno Gimaraysh (“Nyukasl”, Angliya), Kazemiro (“Manchester Yunayted”, Angliya), Ederson (“Atalanta”, Italiya), Jerson (“Flamengo”).
Hujumchilar: Antoni (“Betis”, Ispaniya), Estevan (“Palmeyras”), Martinelli (“Arsenal”, Angliya), Mateus Kunya (“Vulverhempton”, Angliya), Rafinya (“Barselona”, Ispaniya), Risharlison (“Tottenhem”, Angliya), Vinisius (“Real”, Ispaniya).
Eslatib o‘tamiz, Karlo Anchelotti 12-may kuni Braziliya terma jamoasi bosh murabbiyi etib tayinlandi. Braziliya Jahon chempionati saralashi doirasida hozirgacha 14 ta o‘yindan o‘tkazib, 21 ochko bilan turnir jadvalida to‘rtinchi o‘rinni egallab turibdi.
Izoh (0)