“Manchester Yunayted” yarim himoyachisi Brunu Fernandesh 2024/25-yilgi mavsumda muxlislar tomonidan klubning eng yaxshi futbolchisi deb topildi. Bu haqda CBS Sports xabar bermoqda.
Fernandesh klubda 1987/88-yildan beri beriladigan ser Matt Basbi nomidagi sovringa to‘rtinchi bor ega chiqdi. Portugal futbolchisi bunga qadar 2020, 2021 va 2024-yillarda ham ushbu sovrinni qo‘lga kiritgan edi. Shu tariqa portugaliyalik futbolchi bu borada De Xea va Ronalduning natijasini takrorladi – ular ham ushbu sovrinni to‘rt martadan qo‘lga kiritgan.
G‘oliblik yo‘lida Fernandesh Amad Diallo va Harri Maguayrni ortda qoldirdi. 2024/25-yilgi mavsumda Bruno 54 ta o‘yinda maydonga tushib, 19 ta gol urdi va 19 ta golli uzatmaga mualliflik qildi.
Yaqinda biz bu mavzuda Zirkze bilan hazillashdik. U: “Qiziq, bu safar mukofotni kim olarkan?” deb kinoya qildi. Men esa jamoadoshlarim juda yaxshi mavsum o‘tkazishiga umid qilib: “Umid qilamanki, kelasi mavsumda yana kuchli o‘ynayman, lekin hatto nomzodlar qatoriga ham kira olmayman”, deb javob berdim. Agar shunday bo‘lsa, bu meni eng baxtli inson qiladi. Men ularga yordam berish uchun tayyorman, dedi Fernandesh.
Angliya chempionatining yakuniga ikki tur qolganda “Manchester Yunayted” 39 ochko bilan 16-o‘rinni egallab turibdi. Shunga qaramay, Ruben Amorim boshchiligidagi jamoa hali ham Yevropa Chempionlar Ligasiga chiqish imkoniyatini saqlab qolgan. Buning uchun ular 21-may kuni bo‘lib o‘tadigan Yevropa Ligasi finalida Londonning “Tottenhem” klubini mag‘lub etishi kerak.
Brunu Fernandesh “Manchester Yunayted” safiga 2020-yilning yanvarida qo‘shilgan. U bungacha “Sporting”, “Novara”, “Udineze” va “Sampdoriya” jamoalarida to‘p surgan. Portugaliya terma jamoasi safida 78 o‘yinda maydonga tushib, 25 ta gol kiritgan.
Izoh (0)